InfoHub Logo

Máńgilik elimniń máńgilik tili
Ana tili - bárimizdiń anamyz,
Óıtkeni ol - ultymyzdyń anasy. (N. Á. Nazarbaev)

Anamnyń aq sútimen boıyma daryǵan ana tilim, týǵan tilim, qazaq tilim. Tilimniń mártebesin bıik te zańǵar shyńǵa kóterý maqsatynda armanyma qanat bitirtip - til mamany boldym. Mamandyǵym - maqtanyshym. Ár shákirt júregine, rýhanı jan dúnıesine - qazaq tilimniń tereńdigin, baılyǵyn uǵyndyrý tikeleı mindettim. Ár halyqtyń máńgi jasaýy - onyń tilinde. Til - ár halyqtyń ómiri, tarıhy, bolashaǵy.

Qazaq tilim - tereń dem alar tynysym,
Qazaq tilim - erkindigim, teńdigim
Qazaq tilim - káýsár, móldir bulaǵym,
Qazaq tilim - máńgi jasar baılyǵym,- dep júregim alyp ushady.

Men sıaqty ár til mamany - ultymyzdyń erteńi úshin shyr - pyr bolyp júrgen, qazaq tilin qaıtkende bar qazaqtyń sanasyna egemin dep tún uıqysyn tórt bólip júrgen izgi jandar. Keshegi ótken uly danalarymyz Abaı, Ahmet, Muhtar zamanynda til úshin kúres elimizdiń táýelsizdigi úshin kúrespen teń bolǵan. Dúnıede táýelsiz Qazaq eli bar. Álemde egemen Qazaqstan bar. Onyń kóp ultty, tatý, yntymaǵy jarasqan halqy bar. Ár halyqtyń óz ana tili bar. Ár ult ókili memlekettik til qazaq tilin qurmettep, qazaqsha sóılesip dıdarlasady. Qazaqsha aıtysyp, til qaımaǵyn bylǵaǵan aıtysker anamyz - Nadejda Lýshnıkov esimi, qazaqsha ánderdi keremet shyrqaıtyn – Tatánalar, qazaq tiliniń taǵdyryna kóp qazaqqa qaraǵanda shyn jany aýyratyn - Asyly Omanova esimderin erekshe qurmettpen aıtýǵa bolady.

Týǵan tilimniń ár sóziniń tereń maǵynada bolýy, tilimniń qudirettiligi.
Kúndelikti ómirde ár adamnyń sóılegen sózine mán bersem, keı adamdar janyńdy aýyrtyp, júregińe qaıaý túsiredi, keı jandardyń shyn kóńilimen aıtqan biraýyz sózine máz bolyp, marqaıyp qalasyń. Qazaq tiliniń qudirettiligi sonda ár adamnyń sóılegen sózinde, isinde, onyń jan dúnıesi, ishki álemi anyq kórinedi. Sondyqtan da ár sózimizge abaı bolǵanymyz jón. Seni bıikke shyǵaratyn da, tirideı orǵa jyǵatyn da – til. Tilimizdiń qoldaný aıasyn keńeıtý - ár perzent boryshy.
Qazaq halqynyń qyzy bolyp dúnıege kelgenime maqtanamyn. men óz halqymnyń qany men janynan jaralǵan tulǵamyn. Boryshym – qazaq tiliniń taǵdyry, búgini men bolashaǵy.

Tanytqan qazaǵymnyń qazaqtyǵyn,
Tanytqan qazaǵymnyń azattyǵyn.
Tanytqan qazaǵymnyń qaısarlyǵyn,
Aınaldym qudiretińnen, Qazaq tilim.
Adal, meıirban, aq kóńil, jaıdarly minezim bar, arym - namysym, kúsh - jigerim – tilim bar. Memleketttik til - memlekettiń mártebesi.
Qazaq tiliniń Otany - Qazaqstan. Táýelsiz Qazaqstan. Táýelsizdik - tarıhtyń máńgi bolyp ómir súrýine bólingen erkindigi, tynysy. Elimizdiń tynyshtyǵy, qoǵamnyń turaqtylyǵy, turmysy onyń ár múshesiniń parasatty paıymy, sanasy. Qazaqstannyń qazaqsha órkendeıtinine sengim keledi. Jastarymyzdy, óskeleń keıingi urpaqty til mádenıetine, kórkemdigine tárbıeleý, olardyń boıyna tilge degen shynaıy sezimdi oıatý - oryndalar armanym.

Senimmen meıirimdi anamdy uqtym,
Senimmen meıirimdi dalamdy uqtym,
Senimmen jolyn kesip aramdyqtyń,
Shyńyna kóterildim adamdyqtyń.
Elimniń táýelsizdik alǵanyna 25 jyl tolǵaly otyr. Qazaqstan kóz aldymyzda jańa baǵytpen, jańa jolmen ósip, damyp keledi. Táýelsizdik halqymyz úshin ońaılyqpen kelgen joq. Táýelsizdik - tátti uǵym, qasterli sóz. Talaı tar jol, taıǵaq keshýlerden óttik. Myń ólip, myń tirildik. Ata - babalarymyzdyń talaı ǵasyr ańsap ótken armanyna keıingi urpaǵy, biz jettik.
El boldyq, erik aldyq Astanaly,
Endi kimnen qazaǵym jasqanady.
Táýelsizdik ataýy eń aldymen
Nursultan esimimen atalady - degendeı, Elimizdiń táýelsizdigi máńgi bolyp, máńgilik tilimiz órkendep, qanatyn keńge jaıǵan memleket bolyp, ashyq aspan aıasynda, bir shańyraq astynda urpaǵynyń yntymaǵy jarasqan el bolyp baqytty ǵumyr keshkenge ne jetsin?!
Aspanymyz ashyq bolyp,
Aq kógershin samǵasyn.
Barsha halyq tileıtini
Beıbit kúni saqtalsyn.
Bul dúnıede bizdiń bir ǵana Otanymyz bar, Ol - Táýelsiz Qazaqstan Máńgilik el etýdi murat qyldyq,- dep elbasymyz óz halqyna senim artyp otyr. Beıbitshilik pen turaqtylyqta máńgilik el bolaıyq, aǵaıyn!!!
Salt - dástúrimizdi kózdiń qarashyǵyndaı baǵyp júretin, kóptiń kókeıine úmit otyn ana tilinde jaǵyp júretin, eljandy, patrıot, rýhanı jan dúnıesi baı tulǵalarmyz kóp bolsyn!!!

Aqjaıyq aýdany
«Jańabulaq orta jalpy bilim beretin mektebi» KMM - niń
qazaq tili men ádebıeti pániniń muǵalimi
Ýteshkalıeva Jaınagúl Orynbasarqyzy