InfoHub Logo

Mańǵystaý oblysynda jol qaýipsizdigin arttyrý maqsatynda jańa formattaǵy baqylaý júıesi engizildi. "Súzgi" beketteri arqyly júrgizýshiler qalaı tekseriledi?

Bul týraly Infohub.kz aqparat agenttigi habarlaıdy.

Oblys aýmaǵyndaǵy joldarda jańasha baqylaý júıesi – «súzgi» beketteri jumys isteı bastady. Bul júıeniń negizgi maqsaty – jol qozǵalysyn retteý jáne júrgizýshilerdi iriktep tekserý arqyly qaýipsizdikti kúsheıtý.

Joldaǵy jańa baqylaý júıesi qalaı jumys isteıdi?

Óńirlik polısıa departamenti patrúldik polısıa rotasynyń komandıri Taıman Anshybaevtyń aıtýynsha, «súzgi» beketteri – bul arnaıy uıymdastyrylǵan ýchaskeler. Munda joldyń eni ýaqytsha taryltylyp, kólik aǵynynyń jyldamdyǵy azaıtylady. Osylaısha, júrgizýshilerdi toqtatyp, qujattaryn tekserýge jáne jol erejelerin saqtaýyn baqylaýǵa múmkindik týady.

Qazirgi tańda mundaı beketterdiń biri Aqtaý-Beıneý avtojolynyń 144-shaqyrymynda, Shetpe aýyly mańynda ornalasqan. Munda patrúldik polısıa qyzmetkerleri júrgizýshilermen profılaktıkalyq áńgimeler júrgizip, jol erejeleriniń saqtalýyn qadaǵalaıdy.

Jobanyń tıimdiligi

Taıman Anshybaevtyń málimetinshe, bul joba kólik ınspeksıasymen birlesip atqarylýda jáne qazirdiń ózinde oń nátıjeler kórsetip úlgergen. «Súzgi» beketterin engizý arqyly jol qatysýshylary úshin qaýipsiz orta qalyptastyrý jáne óńirdegi jol-kólik oqıǵalarynyń sanyn azaıtý kózdelgen.

«Júrgizýshilerdi jańa talaptardy túsinistikpen qabyldap, jol erejelerin qatań saqtaýǵa shaqyramyz», - dedi Taıman Anshybaev.

Esterińizge sala keteıik, 2026 jyldyń 12 naýryzynan bastap Qazaqstanda júrgizýshilerdiń kólik júrgizý kezinde uıaly telefondy paıdalanǵanyn avtomatty túrde anyqtaıtyn ózgerister kúshine engen bolatyn. Endi ınspektordyń qatysýynsyz, jańa tehnologıalardy qoldaný arqyly buzýshylyqtar úshin aıyppul salynady.