InfoHub Logo

Qazaqstan Energetıka mınıstrligi Mańǵystaýda tárkilengen munaı aktıvterin — JSHS «Mangystau Oil Refinery» men «Meliana» tankerin — aýksıon ótkizilip, jańa ıesi anyqtalǵanǵa deıin senimgerlik basqarýǵa berýge konkýrs jarıalady. Bul sheshim óńirdegi óndiris turaqtylyǵyn saqtap, jumys oryndary men áleýmettik kepildikterdiń úzdiksizdigin qamtamasyz etý úshin mańyzdy.

Bul týraly Infohub.kz aqparat agenttigi habarlaıdy.

Tenderdiń máni jáne mindetteri

Mınıstrlik habarlaýynsha, senimgerlik basqarý sottyń birinshi ınstansıasy (Aqtaý) 2025 jylǵy 3 jeltoqsanda shyǵarǵan qaýlysyna sáıkes engiziledi jáne aktıvter satýǵa shyǵarylatyn aýksıon aıaqtalǵanǵa deıin jalǵasady. Negizgi maqsattar: óndiris úderisin toqtatpaý, jumys oryndaryn saqtaý, zaýyt qyzmetkerleri men tanker ekıpajyna jalaqy jáne ózge de mindetti tólemderdi ýaqytynda óteý.

Kimder qatysa alady

Qatysýǵa qarjylyq turǵyda ornyqty, tıisti tájirıbesi men resýrstary bar kompanıalar, sonyń ishinde munaı óńdeý salasyndaǵy uıymdar shaqyrylady. Mınıstrlik senimgerlik basqarýshydan tárkilengen múlikti tıimdi ári ashyq basqarýdy, óndiristik jáne áleýmettik turaqtylyqty qamtamasyz etýdi kútedi.

İstiń tarıhy: qalaı tárkilendi

inbusiness.kz dereginshe, JSHS «Mangystau Oil Refinery» men oǵan affılıırlengen kompanıalardyń basshylary men qyzmetkerlerinen quralǵan uıymdasqan top Aqtaý porty arqyly munaıdy «peshtik otyn» retinde kórsetip, zańsyz eksporttaǵan. 2025 jyldyń qyrkúıeginde sot osy iske qatysty bes adamdy árqaısysyn 8 jylǵa bas bostandyǵynan aıyrý jazasyna kesti.

Memleket kirisine munaı ónimderi, kompanıalardyń jyljymaıtyn múlikteri, shaǵyn qýatty munaı óńdeý zaýyty jáne «Meliana» tankeri tárkilendi. Memleketke keltirilgen zıan 1,16 mlrd teńgeden asty. Qazirgi tańda aktıvter memleket menshigine ótti jáne olardy senimgerlik basqarý arqyly turaqty jumysyn qamtamasyz etý kózdelip otyr.