InfoHub Logo

Bıylǵy naýryz aıyndaǵy Ulttyq biryńǵaı testileýge (UBT) qatysqan 179 myńnan astam talapkerdiń nátıjesi jarıalandy. Alaıda, bul joly júzdegen talapker emtıhan erejelerin buzǵany úshin testileýden shettetildi. Bul týraly QR Ǵylym jáne joǵary bilim mınıstrligi málimdedi.

Bul týraly Infohub.kz aqparat agenttigi habarlaıdy.

Testileý nátıjeleri

Mınıstrlik derekterine súıensek, talapkerlerdiń 75 paıyzy emtıhandy qazaq tilinde, 25 paıyzy orys tilinde tapsyrǵan. Al 157 adam aǵylshyn tilin tańdapty.

Jalpy, bes pán boıynsha ortasha bal – 66 bolsa, eń joǵary kórsetkish 140 balǵa jetken. Talapkerlerdiń 70 paıyzy belgilengen shekti baldy eńsere aldy.

Atyraý oblysynyń Jazıra Keńesova erekshe kózge tústi. Ol tórt pánnen 90 bal jınap, qazaq tilinen KAZTEST sertıfıkatyn paıdalanyp, qorytyndy balyn 140-qa jetkizgen.

Apelásıa jáne komısıa sheshimi

Testileý aıaqtalǵan soń 30 mınýt ishinde talapkerler tapsyrma mazmunyna qatysty apelásıa bere aldy. Al tehnıkalyq sebepter boıynsha shaǵymdar emtıhan kezinde qabyldandy.

Barlyǵy 31 myńnan astam ótinish kelip túsken. Onyń ishinde 17 tapsyrma boıynsha ótinishter qanaǵattandyryldy. Respýblıkalyq komısıa jumysyn aıaqtap, sertıfıkattar qatysýshylardyń jeke kabınetterine qoıyldy.

Suranysqa ıe pánder

Talapkerler arasynda «Matematıka-Fızıka» kombınasıasy eń kóp tańdalǵan – 18,7 paıyz. Odan keıin «Bıologıa-Hımıa» kombınasıasy – 16,5 paıyz.

Úshinshi orynda «Shyǵarmashylyq emtıhan» tur, ony 10,3 paıyz talapker tapsyrǵan.

Ereje buzýshylyqtar

Erekshe bilim berý qajettiligi bar 408 talapker testileýge qatysty. Olar úshin arnaıy jaǵdaılar jasalǵan.

UBT kezinde 264 ereje buzýshylyq tirkeldi. Onyń 130-y tyıym salynǵan zattardy (smartfon, «shpargalka») alyp ótpek bolǵandyqtan, emtıhannan shyǵaryldy.

Taǵy 134 talapker emtıhan erejesin buzǵany úshin aýdıtorıadan shyǵarylyp, nátıjeleri joıyldy. Ózge adamdardyń atynan kirgen jaǵdaılar anyqtalmady.

Qosymsha tekserý

UBT-2026 aıaqtalǵannan keıin 31 qazanǵa deıin beınejazbalar taldanady. Eger buzýshylyqtar anyqtalsa, testileý nátıjeleri joıylýy múmkin.