InfoHub Logo

Másele bastan asady: Kólik mınıstri ne úshin kútpegen jerden qyzmetinen ketti?

Marat Qarabaevtyń otstavkasy – saıası sahnada kútpegen ári eleýli oqıǵa. Onyń qyzmetinen bosatylýy demalys kúni jarıalanyp, ózi issaparda júrgende bilgeni bul jaǵdaıdy odan saıyn jumbaqqa aınaldyrdy.

Kópshilik Qarabaevtyń ornyn bosatýyna eldegi avtojoldardyń múshkil jaǵdaıy, ásirese Jezqazǵan – Qyzylorda baǵytyndaǵy jol qurylysyndaǵy uzaqqa sozylǵan problemalar sebep boldy dep topshylaıdy. Biraq aıta keterlik jaıt: bar bolǵany úsh apta buryn Memleket basshysy bul másele úshin mınıstrge sógis jarıalap, qyzmetinde qaldyrǵan edi.

Saıası tájirıbede bir sheneýnikti bir másele úshin eki ret jazalaý — sırek jaǵdaı. Sondyqtan Qarabaevtyń otstavkasyna basqa da ishki sebepter men yqpaldar áser etýi múmkin degen boljamdar aıtylýda.

Qazirgi ýaqytta Úkimet te, Prezıdent ákimshiligi de otstavkanyń naqty sebebi týraly resmı túsinikteme bergen joq. Al Qarabaevtyń ózi bul sheshimge túsiniksiz kúıde qalǵanyn bildirdi.