InfoHub Logo

Tanymal prodúser Baıan Alagózova Qazaq Ordasy arnasyna bergen suhbatynda keıbir juldyzdardyń óz senimin kópshilikke jarıalaǵanymen, keıin ıslam talaptaryna saı ómir súrmeıtinin aıtty.

Onyń aıtýynsha, keıbireýler Mekkege saparyn kópshilikke jarıalap, sol jerde túsirilgen sýretterin ashyq túrde bólisedi. Muny Baıan Alagózova mádenıetsizdik pen ekijúzdilik dep atady.

"Jarıa túrde Mekkege barady, jarıa túrde Mekkeniń aıasynda selfı jasaıdy, jarıa túrde bárin kórsetedi. Munyń bárin osylaı ashyq kórsetý – naǵyz mádenıetsizdik. Al keıin Mekkeden kelgen soń sol baıaǵy qydyrý, ishimdik ishý jalǵasa beredi. Bul – ekijúzdilik. Muny bireý aıtýy kerek", – dedi ol.

Sondaı-aq ol áriptesterine úndeý jasap, qasıetti orynǵa barmas buryn óz is-áreketterine jaýapkershilikpen qaraýǵa shaqyrdy.

"Eger Mekkege baratyn bolsańyzdar, Qudaıdy aldaýdyń qajeti bar ma, joq pa – myń ret oılanyńyzdar. Keıin kelip alyp, qaıtadan iship, shegip, qydyryp, boqtap, qýyp júretin bolsańyzdar", – dedi Baıan Alagózova.

Baıan Alagózova – qazaqstandyq shoý-bıznes salasyndaǵy tanymal prodúser, aktrısa, telejúrgizýshi jáne ánshi. Ol 1974 jyly 9 qańtarda Oral qalasynda dúnıege kelgen. Alǵashqy tanymaldylyǵy 1993 jyly jaryq kórgen "Mahabbat beketi" fılmindegi róli arqyly keldi. Keıin jýrnalısıkada jumys istep, telejúrgizýshi retinde túrli jobalardy júrgizdi. 2006 jyldan bastap prodúserlik qyzmetpen belsendi aınalysa bastady. Ol "KeshYOU" toby sekildi tanymal mýzykalyq jobalardy qolǵa alyp, kóptegen jas ónerpazdardyń sahnaǵa shyǵýyna yqpal etti.

Jeke ómirinde ol eki ret turmys qurǵan, birneshe qyz tárbıelep otyrǵan ana. Qazirgi tańda kásipker Tursynǵalı Alagózovpen otbasyn qurǵan.