InfoHub Logo

Meksıkadaǵy esirtki kartelderiniń basshysy óltirilgennen keıin elde tártipsizdikter men qylmys órshı tústi. Osyǵan baılanysty AQSH, Kanada jáne basqa da birqatar memleketter óz azamattaryna Meksıkada qaýipsizdik sharalaryn kúsheıtip, múmkindiginshe úıden shyqpaýǵa keńes berdi.

Bul týraly Infohub.kz aqparat agenttigi habarlaıdy.

Halısko shtatynda «qyzyl kod» jarıalandy

«Halısko — Jańa býyn» (CJNG) esirtki karteliniń basshysy Nemesıo Osegera Servantes («El Mencho») áskerı operasıa kezinde óltirilgennen keıin, Halısko shtatynyń gýbernatory Pablo Lemýs «qyzyl kod» rejımin, ıaǵnı tótenshe jaǵdaıdy jarıalady. Elde joldar jabylyp, órt shyǵý faktileri tirkeldi. Áskerı bólimsheler qalalarǵa kirgizildi.

Kólik qatynasy men áýe reısteri toqtatyldy

Qaýipsizdik jaǵdaıyna baılanysty Meksıkanyń áýe kompanıalary Halısko shtatyna baratyn keıbir reısterin toqtatty. Sondaı-aq, el boıynsha avtobýs qatynasy da buzyldy. Eń iri oqıǵalar Gvadalahara men Pýerto-Valárta qalalarynda boldy.

Basqa aımaqtarǵa da tarady

Zorlyq-zombylyq tolqyny Mıchoakan, Kolıma jáne Tamaýlıpas shtattaryna da tarady. AQSH elshiligi óz azamattaryna aınalasyna nazar aýdarýdy, quqyq qorǵaý organdary jumys isteıtin jerlerden aýlaq bolýdy jáne múmkindiginshe úıden shyqpaýdy usyndy.

Kanada úkimeti Pýerto-Valártada «óz úıinde qalý rejımi» engizilgenin habarlady. Ulybrıtanıa, Avstralıa jáne Úndistan da óz azamattaryna saqtyq sharalaryn kúsheıtý týraly eskertý jasady.