InfoHub Logo

Elimizdiń mektep basqarý júıesinde kadr tapshylyǵy baıqalady. Oqý-aǵartý mınıstri Juldyz Súleımenovanyń aıtýynsha, qazirgi tańda respýblıka boıynsha 490 mektep dırektorynyń orny bos.

Bul týraly mınıstr óńirlik bilim basqarmalary basshylarymen ótken alqa otyrysynda málimdedi. Dırektor jetispeýshiligi ásirese Soltústik Qazaqstan, Aqmola, Shyǵys Qazaqstan jáne Qaraǵandy oblystarynda aıqyn seziledi.

Úmitkerlerdiń tek 21%-y ǵana talapqa saı

Kadr tapshylyǵynyń negizgi sebebi – úmitkerlerdiń basqarýshylyq quzyretiniń jetkiliksizdigi. 2025 jyly ótkizilgen testileý nátıjesi boıynsha, mektep dırektory laýazymyna úmitkerlerdiń tek 21 paıyzy ǵana synaqtan sátti ótken. Bul ár bes kandıdattyń tórteýiniń talapqa saı kelmegenin kórsetedi.

Mınıstrlik basqa óńirlerden tájirıbeli menedjerlerdi tartý múmkindigin qarastyryp jatyr. Mınıstrdiń sózinshe, basqarýdaǵy álsizdik bilim sapasyna, muǵalimder arasyndaǵy kásibı ahýalǵa jáne mektep ishindegi klımatqa tikeleı áser etedi.

Formaldy esepke emes, nátıjege basymdyq beriledi

Alqa otyrysynda mınıstr formaldy esepke negizdelgen tásildi synǵa aldy. «Bizge qaǵaz júzindegi kórsetkish emes, oqýshy biliminiń naqty ósýi kerek. Shynaıy nátıjege tek ashyq talqylaý men birlesken sheshim arqyly jetemiz», – dedi mınıstr.

Dırektor laýazymy – ýaqytsha mısıa

Buǵan deıin mınıstr mektep dırektorlaryn eki oqý jylyna ǵana taǵaıyndaý týraly bastama kótergen bolatyn. Bul usynys qoǵamda qyzý pikirtalas týdyrdy. Mınıstr óz ustanymyn naqtylady: «Mektep dırektory – ómir boıy otyratyn oryntaq emes. Bul – belgili bir merzimge júkteletin basqarýshylyq mısıa».

Jańa tártip boıynsha, dırektor alǵashqyda 2 oqý jylyna taǵaıyndalady. Jumysy oń baǵalansa, ókilettigi taǵy 2 jylǵa uzartylýy múmkin. Alaıda, bir mektepti 4 oqý jylynan artyq basqarýǵa ruqsat etilmeıdi. Bul ózgerister mektep basqarý júıesine jańa serpin berip, jaýapkershilik pen tıimdilikti arttyrýǵa baǵyttalǵan.