InfoHub Logo

Elektrondy qurylǵylardyń ómirimizdiń bir bólshegine aınalyp, myzǵymas oryn alǵany shyndyq. Ata-analar men muǵalimder dabyl qaǵyp, balalaryn smartfon, planshetterden shekteýge tyrysqanymen, mundaı qurylǵylardy balanyń oı-órisin damytatyn paıdaly qosymshalardyń bar ekendigin bile bermeıdi. Baǵdarlama jasaýshylar balalardy mektepke daıyndaýǵa arnalǵan túrli paıdaly qosymshalar jasaýdy áldeqashan qolǵa alǵan. Bul oraıda nazarlaryńyzǵa búldirshinderimizdi damytatyn paıdaly qosymshalar qataryn usynamyz.

«Mektep jasyna deıingi balalarǵa arnalǵan matematıka»

Balany túrli esepter men mysaldardy sheshýge kóndirý ońaıdyń isi emes. Atalǵan qosymsha balalardy oıyn túrinde sandarmen tanystyryp, qosý-alýǵa, salystyrýǵa jáne esepti jyldamdyqqa sheshýge kómektesedi. Tapsyrmalar kúrdeliligi boıynsha birneshe deńgeıge bólingen jáne 3-7 jas aralyǵyndaǵy balalarǵa arnalady.

Qosymshaǵa engizilgen kómekshi quraldardyń kómegimen bala ony ózdiginen qoldana alady. Alaıda arnaıy ata-analar úshin statısıka bólimin qarastyrǵan. Qosymsha ınterfeısi – qarapaıym ári túsinýge jeńil. Al qosymshaǵa degen qyzyǵýshylyǵyn týǵyzyp, nazaryn aýdarý maqsatynda túrli kólemdi, qyzyqty sýretter engizilgen.

• Android

«Ýchýbýka PRO»

Ekranda paıda bolǵan áripter janýar ataýyn qurastyrýǵa múmkindik beretin qosymsha balany oqýǵa úıretedi. Munda birden eki ádis qoldanylady. Dástúrli túrinde janýar ataýyn quraǵan kezde ár árip dybystalyp otyrady. Al ekinshi fonetıkalyq ádis boıynsha, qosymshadaǵy dıktor dybystyń qandaı bolýy kerektigin kórsetedi. Atalǵan ádisterdiń biriktirilýi aqparattyń anaǵurlym jaqsy este saqtalýyna kómektesedi.

Eń birinshi kezekte, «Ýchýbýka» – balalardyń erte jastan damýyna arnalǵan. Alaıda qosymshada kúrdeliliktiń eki deńgeıi bar: jeńildikpen jáne jeńildiksiz.

• iOS

«Kirpiniń hıkaıasy»

4 pen 6 jas aralyǵyndaǵy balalarǵa arnalǵan ınteraktıvti damytatyn oıyn. Mundaǵy ertegi logıka, zeıindilik, kórý arqyly este saqtaý jáne «keńistikte oılaý» qabiletin damytýdy qamtıdy. Qosymshada labırıntten ótip, pazldar jınap, zattardy toptastyryp, artyq jáne erekshe bólshekterdi tabýǵa bolady.

Oıyndy balalar psıhology oılap tapqan. Sondyqtan oıynnyń astarynda damytatyn sabaqtarda qoldanylatyn ádister jatyr.

• Android
• iOS

«MarcoPolo aýa raıy»

Qosymsha aýa raıyndaǵy túrli ózgerister men qubylystardy oıyn túrinde túsindirip, qorshaǵan ortada bolyp jatatyn ózgeristerdi kórsetedi. Oıynshy jeldi basqaryp, jańbyr men qar jaýǵyzyp, kempirqosaq jasap, aýa temperatýrasyn kóterip ne tómendetip, daýyl, quıyn turǵyza alady. Oıynshynyń ár áreketi qorshaǵan ortaǵa áser etedi. Nátıjesinde bala aýa raıynyń tabıǵı landshaftyny qalaı ózgertetinin, keıipkerlerdiń kúndelikti ómiri men túrli zattardyń kúıin kóre alady.

Qosymsha ár túrli jastaǵy balalarǵa arnalǵan. Sol sebepti oıyn aıasynda tabıǵattaǵy sý aınalymyn bilip qana qoımaı, kıim tańdap úırenýge de bolady. 

• Android
• iOS

«Balalarǵa arnalǵan sýret salǵysh»

«Balalarǵa arnalǵan sýret salǵysh» ekranda túrli keıipkerlerdi salýǵa múmkindik beredi. Ol ekrandaǵy syzyqtar boıymen saýsaqty júrgizý arqyly júzege asady. Mundaı ádis qoldy jazýǵa daǵdylandyrýǵa, usaq motorıkany damytýǵa kómektesedi. Qosymshada oıyn elementi de qarastyrylǵan: salynǵan sýretter «tirilip», keıipkerler sekirip, túrli dybystar shyǵara alady. Atalǵan qosymsha kez-kelgen balanyń qyzyǵýshylyǵyn týdyratyny anyq.

• Android
• iOS

«Adam denesi»

Qosymsha anatomıa negizderimen tanysýǵa múmkindik beredi. Ol arqyly aǵzalardyń qalaı jumys isteıtinin bilip, olardyń arasyndaǵy baılanysty baqylaýǵa bolady. Sonymen qatar bala alty qabatqa bólingen dene úlgisin zertteı alady: qańqa, bulshyq et, tynys alý, as qorytý, júıke, júrek-qan tamyrlar júıeleri jáne nesep-jynys júıesi. Atalǵandardyń sońǵysy tek «ata-analarǵa arnalǵan bólimde» kórsetiledi. Odan bólek qosymshada denemizdegi aǵzalar anımasıalanǵan. Sondyqtan júrek soǵysyn, tynys alǵanda ókpeniń keńeıýin, ishtiń quryldaýyn kózben kóre alasyz. Bul rette qurylǵynyń túrli múmkindikteri de eskerilgen: aldyńǵy kamera kóz kórýin tamashalaýǵa múmkindik berse, mıkrofon – estý qabileti jaıly túsindirý úshin.

Qosymsha 4 jastan asqan balalarǵa arnalǵan. Onda birneshe qoldanýshyǵa arnalǵan rejım bar. Sonymen qatar ata-analarǵa arnalǵan bólim men anyqtamalyq kitaphana engizilgen.

• iOS

«Star Walk Kids: Balalarǵa arnalǵan astronomıa»

StarWalkKids balalardy ǵarysh jáne Kún júıesimen tanystyryp, ǵalamsharlar men aspan deneleri jaıly maǵulmat berip, juldyzdy aspan kartasyn oqýǵa úıretedi. Qosymshanyń qyzyqty ereksheligi – dál qazir aspannan neni kóre alatynyńyzdy anyqtaý úshin, geolokasıa jáne gıroskopty qoldaný. Ol úshin planshet ne telefonyńyzdy joǵary kóterýińiz jetkilikti. Qosymsha dál sol ýaqytta aspanda turǵan juldyzdar, shoqjuldyzdar men ǵalamsharlardy kóresetedi. Málimet mátin, múltfılm nemese aýdıotrek túrinde beriledi.

• Android
• iOS

«Ormanda ne ósedi»

Bul qosymsha – eýropalyq ormandaǵy aǵashtar, jeýge jaramly jáne jaramsyz sańyraýqulaqtar men jıdekter, gúlder jáne t.b. tárizdi ósimdikter jaıly málimet beretin ınteraktıvti anyqtamalyq. Oıynshy ósimdikti nusqaǵanda, onyń ataýy, jalpy málimet pen qyzyqty derekter paıda bolady.

«Ormanda ne ósedi» qosymshasy bizdi qorshaǵan floramen tanysyp, ósimdikterdiń túrli qasıetin bilýge múmkindik beredi. Al alǵan bilimimizdi serýendegende ne sabaqta tájirıbe júzinde qoldana alamyz.

• Android
• iOS

«Pishinderdi tanımyz»

Qosymsha geometrıa negizderimen tanysyp, dóńgelek, sheńber, sopaq, tik tórtburysh, romb, trapesıa jáne sharshy syndy negizgi pishinderdi bilýge úıretedi. Alǵan bilimdi bekitý úshin, ár pishinge baılanysty taqpaqtar men oıyndar engizilgen.

• Android
• iOS

«Tobbı: janýarlar álemi»

Bala keıipkerge otbasyn tabýǵa kómektesetin oıyn. Otbasyn izdestirý kezinde jolda túrli ańdar men qustar ushyrasady. Oıynshy olardyń ataýyn, qaıda tirshilik etetinin jáne nemen qorektenetinin bile alady.

Qosymsha 2-5 jas aralyǵyndaǵy balalarǵa arnalǵan ári balanyń logıkasy men zeıindiligin damytýǵa baǵyttalǵan. Oıynda 25 túrli janýarlar týraly málimet beriledi. Sonymen qatar bala ózdiginen qoldana alatyndaı jeńil oılastyrylǵan.

• Android
• iOS

---