InfoHub Logo

Qazaqstan mektepterinde oqýshylarǵa smartfon qoldanýǵa tyıym salý máselesi kóterildi. Bul tyıym tek sabaq ýaqytymen shektelmeı, tipti úzilis kezinde de qoldanylmaq. Bul jańalyq kópshiliktiń, ásirese ata-analar men oqýshylardyń alańdaýshylyǵyn týdyrdy. Endigi kezekte, balalar mektep asqanasynda qalaı tamaqtanatyny jáne tólem jasaıtyny týraly suraqtar týyndaýda.

Bul týraly Infohub.kz aqparat agenttigi habarlaıdy.

Smartfonsyz asqanadaǵy tólem máselesi

Májilis depýtaty Asqat Aımaǵambetov bul máselege qatysty pikir bildirdi. Onyń aıtýynsha, mektepterde POS-termınaldardyń sany kóbeıedi. Bul oqýshylarǵa bank kartasymen nemese qolma-qol aqshamen tólem jasaýǵa múmkindik beredi. Depýtat buǵan deıin de osy máseleni kóterip, tek QR-kod arqyly tóleýdiń zańsyz ekenin atap ótken bolatyn. Onyń oıynsha, árbir asqanada POS-termınal mindetti túrde bolýy tıis.

Mektepterde uıaly telefondardy saqtaý tártibi

Jýrnalıserdiń «Amerıkadaǵydaı shkaftar bolady ma?» degen suraǵyna depýtat jaýap berdi. Ol bul normany engizýge bolatynyn, biraq onyń praktıkada qalaı jumys isteıtinin muqıat qarastyrý kerektigin aıtty. Mektep dırektorlary telefon joǵalǵan jaǵdaıda jaýapkershilikten qorqatynyn jetkizdi. Keıbir mektepterde arnaıy beınebaqylaý kameralary ornatylǵan, al keıbirinde telefondy salyp qoıatyn arnaıy cheholder qoldanylady. Keıbir mektepterde smartfondardy saqtaıtyn arnaıy bólmeler de bar.

«Bul normany erteń-aq engizemiz demeımiz, bul daıyndyqty, talqylaýdy talap etedi», — dedi Aımaǵambetov.

Ata-analar balalarymen qalaı baılanysady?

Depýtatqa ata-analardyń balalaryn sabaqtan keıin qalaı alyp ketetini týraly da suraq qoıyldy. Aımaǵambetov burynǵy ýaqytty eske alyp, muǵalim arqyly habarlasýǵa bolatynyn aıtty. Ol óziniń balalarynyń da smartfonsyz mektepke baratynyn jáne bul eshqandaı qıyndyq týdyrmaıtynyn jetkizdi.

Qazirgi tańda mektep ákimshiligi oqýshylardyń smartfondy paıdalanýyna qatysty óz sheshimin qabyldaı alady. Zań júzinde tek sabaq kezinde ǵana tyıym salynǵan, al úzilis kezinde qoldanýǵa ruqsat etilgen. Eger telefon oqý maqsatynda qajet bolsa, muǵalimniń sheshimimen paıdalanýǵa bolady.

Bul zań jobasy áli de eki ret qaralyp, Senatta talqylanady. Prezıdent qol qoıǵannan keıin ǵana kúshine enedi.