InfoHub Logo

Qazaqstan mektepterindegi muǵalimderdi attestasıalaýdyń jańa erejeleri qoǵamda qyzý talqylanyp jatyr. Osy oraıda, belsendi pedagog Aıman Saǵıdýlla Oqý-aǵartý mınıstri Juldyz Súleımenovaǵa úndeý joldap, júıedegi kemshilikterdi ashyq aıtty.

Bul týraly Infohub.kz aqparat agenttigi habarlaıdy.

Pedagogtyń aıtýynsha, birneshe aı boıy jumys tobynda bolǵan muǵalimderdiń ózi jańa ózgeristerden habarsyz qalyp otyr. Aıman Saǵıdýlla attestasıa kezinde talap etiletin ashyq sabaqtardyń formaldylyqqa aınalǵanyn, bul "shoý-sabaqtardyń" muǵalimniń ýaqytyn ǵana emes, oqýshylardyń bilim alýyna da keri áserin tıgizetinin alǵa tartty.

"Shyndyqtyń qanyn jalaǵanymyz durys edi"

Aıman Saǵıdýlla óz sózinde muǵalimderdiń attestasıadan ótý úshin "shoý-sabaqtar" kórsetip, ýaqytty bosqa ótkizip jatqanyn synǵa aldy. "Ótiriktiń maıyn ishkenshe, shyndyqtyń qanyn jalaǵanymyz durys edi. Bir ótirikten qutyla almaı júrgende ekinshi ótirik. Jumys tobynan shyǵyp ketkenim jaqsy boldy. Áıtpese oqýshylardyń kóz jasyna qalar edim", - dep jazdy ol.

Baǵalaý júıesine kúmán

Pedagog sonymen qatar, qazirgi baǵalaý júıesiniń, atap aıtqanda, toqsandyq jáne jyldyq baqylaý (BJB men TJB) nátıjeleriniń shynaıylyǵyna da kúmán keltirdi. Ol portfolıo men qosymsha qujattardy alyp tastap, onyń ornyna pándik testti saqtap qalýdy usyndy. "Mektep baǵdarlamasyna negizdelgen testti bilimi bar muǵalimderdiń bári tapsyra alady. Al 50 suraqtan qashatyn muǵalimge 140 suraqtyq testke oqýshy daıyndaýdy tapsyrý – orynsyz", - dep esepteıdi ol.

Aıman Saǵıdýlla mınıstrlikti attestasıa talaptaryn qaıta qarap, muǵalimderge artyq júkteme túsirmeıtin tıimdi júıe qalyptastyrýǵa shaqyrdy.