InfoHub Logo

Qazaqstannyń basty maqsaty  - bilim berý sektorynyń eksporttyq áleýetin ósirý. Bul týraly Koreıa Respýblıkasyna memlekettik sapary aıasynda búgin Seýldegi Enseı ýnıversıtetinde bolǵan QR Prezıdenti Nursultan Nazarbaev aıtty, dep habarlaıdy QazAqparat.

«Basty maqsaty bolashaqtyń kóshbasshylaryn daıyndaý bolyp sanalatyn sizderdiń ýnıversıtetterińizdiń qurmetti doktory ataný men úshin súısindirerlik jaıt. Bul rette ýnıversıtet basty nazarda erkindik ustanymyn alǵa qoıyp otyrǵandyǵy da mańyzdy. Bul ustanymdy qoldaımyn ári ol eliniń jáne búkil órkenıettiń damýyna baǵaly úlesin qosatyn urpaq tárbıeleýge basty  sharttardyń biri dep sanaımyn.  Sońǵy jyldardaǵy Koreıanyń ekonomıkalyq jáne áleýmettik damýdaǵy jetistigine bul dálel bola alady», - dedi Nazarbaev.4

Memleket basshy eki urpaq býyny aýysqan qysqa ǵana merzimniń ishinde Koreıanyń sheteldik kómek alýshy elden iri donarǵa aınalǵandyǵyn basa aıtty.

«Sizder 2025 jyly ǵylym men tehnıka salasyndaǵy básekege qabilettilik deńgeıi boıynsha úzdik 7 eldiń qataryna kirý maqsatyn senimdi túrde júzege asyra alasyzdar. Jetistik kilti adamı resýrstardy damytý bolyp sanalady. Biz Keńes odaǵy kúıregennen keıin qurylǵan jas memleket ár  ýaqytta sizderdiń tájirıbelerińizge qaradyq. Ózimizdiń memlekettigimizdi qalyptastyrýdyń bastaýynda Ońtústik-SHyǵys Azıa jolbarystarynyń biri - Ońtústik Koreıadan  úırendik te», - dedi Qazaqstan Prezıdenti.

Elbasy Koreıanyń kreatıvti ekonomıkany damytýdaǵy saıasatyna oń baǵa bere kele, Qazaqstanda da ekonomıka men búkil qoǵamdy jańǵyrtý júrgizilip jatqanyn aıtty.

«Reformalarda ǵylymı qamtymdy ekonomıkany qurý jáne EYDU elderi standarttary negizinde adam kapıtaly sapasyn arttyrýǵa aıryqsha mán beriledi. Bizdiń basty maqsatymyz  - shyǵarylatyn kadrlardyń básekege qabilettiligin arttyrý jáne bilim berý sektorynyń eksporttyq áleýetin ósirý», - dedi Nazarbaev.

---