InfoHub Logo

Memleket basshysy Qasym-Jomart Toqaev Qarjy monıtorıńi agenttiginiń (QMA) tóraǵasy Janat Elımanovty qabyldady. Kezdesýde agenttiktiń atqarǵan jumystary men aldaǵy kezeńge arnalǵan mindetteri baıandaldy.

Bul týraly Infohub.kz aqparat agenttigi habarlaıdy.

Memlekettik qarajattyń tıimsiz jumsalýy

Janat Elımanovtyń aıtýynsha, búdjet shyǵystaryn baqylaý barysynda mal sharýashylyǵy salasyndaǵy sýbsıdıalardyń tıimsiz qoldanylýyna qatysty 30 mıllıard teńge kólemindegi táýekelder anyqtalǵan. Sondaı-aq, ǵylymı zertteýler men ǵylymı-tehnıkalyq qyzmet nátıjelerin komersıalandyrýǵa bólingen granttar esebinen 10 mıllıard teńgeden astam qarjynyń ysyrap etilgeni týraly belgiler tabyldy.

Qarjylyq pıramıdalar men alaıaqtyq

Medısınalyq saqtandyrý qorynyń (OSMS) qarajatyn jymqyrý faktileri boıynsha 14 sotqa deıingi tergeý bastaldy. Qurylys kezinde 5,3 mıllıard teńgeni jymqyrý boıynsha 21 qylmystyq is tergelýde. Alaıaqtyqpen kúres salasynda 17 qarjylyq pıramıda joıylyp, bankter men baılanys operatorlary atynan arnaıy qurylǵylardy paıdalanyp, jappaı fıshıngtik SMS-habarlamalar taratqan toptyń áreketi áshkerelendi. 3,7 myń alaıaqtyq saıt pen 25 myńnan astam adamdy biriktirgen 22 toptyq chat jabyldy. 400-den astam nomınaldy qurylys kompanıasyna birinshi sanattaǵy lısenzıalardy zańsyz alýyna jol berilmedi.

Qylmystyq kiristerdi jylystatýmen kúres

QMA basshysy qylmystyq kiristerdi jylystatýmen kúres boıynsha da málimet berdi. Atap aıtqanda, jalǵan tulǵalar ashqan 68 myńnan astam karta arqyly jalpy aınalymy 13 mıllıard teńgeden asqan «drop-kartalardy» paıdalaný faktileri boıynsha 14 sotqa deıingi tergeý bastaldy. Jalǵan kompanıalar men qujattardy qoldaný arqyly shamamen 13 mıllıard teńge zalal keltirý faktisi boıynsha 23 sotqa deıingi tergeý júrgizilýde. Qarjylyq pıramıdalar men onlaın-kazınolardan túsken tabystardy jylystatqan úsh «kóleńkeli» krıptoaıyrbastaýshynyń qyzmeti toqtatyldy. Krıptovalútamen zańsyz aınalysatyn 483 onlaın-servıs siltemesine qoljetimdilik shekteldi.

Memleket basshysynyń tapsyrmalary

Memleket basshysy agenttiktiń negizgi baǵyttary boıynsha birqatar tapsyrma berdi. Buǵan deıin Prezıdent ǵylymdy qarjylandyrýda qatań tártip pen qarajatty jumsaýda naqty basymdyqtar bolýy kerektigin atap ótken bolatyn. Ol sońǵy alty jylda ǵylymǵa bólingen qarjynyń eselep artqanymen, odan naqty nátıjelerdiń áli kórinbeıtinin aıtty.