InfoHub Logo

Soltústik Qazaqstan oblysynda shendiler sý tasqynyn syltaý etip, ákimdiktiń esh zaqymdanbaǵan ǵımaratyn jóndeýge búdjetten 156 mıllıon teńge almaq bolǵan.

Bul týraly Infohub.kz aqparat agenttigi habarlaıdy.

Derekterge súıensek, Soltústik Qazaqstan oblysynyń Qyzyljar aýdany ákimdigi ǵımaratty jóndeýge 156 mıllıon teńge bólgen. Resmı málimetter boıynsha, bul qarajat tótenshe jaǵdaıdyń saldaryn joıýǵa baǵyttalǵan.

Ǵımarat zaqymdalmaǵan, biraq jóndeýge aqsha bólingen

Alaıda, memlekettik satyp alý portalyndaǵy málimetterge qaraǵanda, atalǵan ǵımaratta eshqandaı tótenshe jaǵdaı oryn almaǵan. Sý tasqyny kezinde ǵımarat zaqymdalmaǵan. Tipti, beınejazbadan kóringendeı, ǵımarat shuǵyl jóndeýdi qajet etetindeı kórinbeıdi.

Kúmándi merdiger jáne qysqa merzimdegi jumys

Shart jeke kásipkermen jasalǵan. Qyzyǵy sol, bul kásipker memlekettik satyp alý portalynda shart jasalǵan kúni ǵana tirkelgen. Onyń ústine, qurylys jumystaryna qajetti sandyq kodtar shartqa qol qoıylǵanǵa deıin bir apta buryn ǵana qosylǵan. Eń tańqalarlyǵy – jumys aktisi bir apta ishinde rásimdelgen. Bul ǵımaratty bir aptada jóndeýge úlgergen degendi bildiredi.

Prokýratýra aralasty, biraq aqsha tólendi

Bul jaǵdaıǵa prokýratýra nazar aýdaryp, shartty buzý týraly nusqaý bergen. Nátıjesinde, shart bir jaqty tártippen toqtatylǵan. Alaıda, osy ýaqytqa deıin 156 mıllıon teńgeniń 95 mıllıon teńgesi merdigerge tólenip úlgergen.