InfoHub Logo

Endi memlekettik qyzmetkerlerdiń jalaqysy tek laýazymyna ǵana emes, kásibı deńgeıine qaraı ósetin bolady. Senat maquldaǵan jańa zań jobasy boıynsha, qyzmetterin atqarýdaǵy jetistikteri men biliktiligi joǵary mamandarǵa joǵary jalaqy tólenedi.

Bul týraly Infohub.kz aqparat agenttigi habarlaıdy.

Jańa kareralyq ósý modeli

Jańa júıe boıynsha, memlekettik qyzmetshiler bir laýazymnyń ishinde tórt túrli deńgeıde ósý múmkindigine ıe bolady. Bul «gorızontaldy karera» dep atalady. Qyzmetkerdiń kelesi deńgeıge kóterilýi onyń jumys nátıjelerin baǵalaý, qosymsha bilim alýy jáne taǵylymdamadan ótýi sıaqty faktorlarǵa baılanysty bolady.

«Bul memlekettik qyzmettiń tartymdylyǵyn arttyryp, kásibı mamandardy saqtap qalýǵa baǵyttalǵan sharalar keshenin qamtıdy. Endi qyzmetkerler tek joǵary laýazymǵa ǵana emes, óz salasynda da damı alady», - deıdi senator Evgenıı Bolgert.

Jalaqyny ındeksteý jáne qosymsha jeńildikter

Zań jobasynda memlekettik qyzmetshilerdiń jalaqysyn úsh jylda bir ret mindetti túrde ındeksteý qarastyrylǵan. Bul ınflásıanyń áserin azaıtyp, qyzmetkerlerdiń tabysyn turaqty ustaýǵa kómektesedi.

Sonymen qatar, basqa qalaǵa aýysqan qyzmetkerlerge kóterme járdemaqy men kólik shyǵyndaryn óteý qarastyrylǵan. 25 jyldan astam eńbek ótili bar jáne memlekettik nemese vedimistik marapattary bar qyzmetkerlerge zeınetke shyqqanda tórt jalaqy mólsherinde bir rettik syıaqy beriledi.

Eńbek ótiline baılanysty qosymsha aqyly demalys kúnderi de belgilendi: 10 jyldan assa – 3 kún, 15 jyldan assa – 5 kún, 20 jyldan assa – 10 kún. Otbasylyq jaǵdaılarǵa baılanysty 10 kúndik aqyly demalys ta qarastyrylǵan.

Jańa tártipter men kepildikter

Jańa zań boıynsha, qyzmetinen zańsyz bosatylǵan nemese laýazymy tómendetilgen qyzmetkerlerge eń kóbi alty aıǵa deıingi kezeńge jalaqysy nemese jalaqy aıyrmashylyǵy óteledi.

Tártiptik jaýapkershilik júıesi de jetildirilip, jeńildetetin jáne aýyrlatatyn mán-jaılardy eskere otyryp, ıkemdi tásilder engizildi. Sonymen qatar, memlekettik qyzmetshilerdiń kásibı qyzmetine zańsyz aralasýdan qorǵaý kepildikteri kúsheıtildi.