InfoHub Logo

Jýrnalıs Botagóz Omarovanyń «kórineý jalǵan aqparat taratty» degen aıyppen úıqamaqqa alynýy qoǵamda úlken rezonans týdyrdy. Bul oqıǵa áleýmettik jeliler men aqparat quraldarynda qyzý talqylanyp, sóz bostandyǵy, jýrnalıs jaýapkershiligi jáne azamattardyń ar-namysy men bedelin qorǵaý máselesin qaıta kún tártibine shyǵardy, dep habarlaıdy infohub aqparat agenttigi.

Osy ýaqytqa deıin qoǵamda negizinen jýrnalısiń ózi men ony qoldaýshylardyń pikiri keńinen tarasa, endi daýlasýshy ekinshi tarap ta óz ustanymyn jarıa túrde jetkizdi.

Botagóz Omarovaǵa qarsy aryz túsirgen «VD Injınırıń» kompanıasynyń quryltaıshysy Azamat Úsimbekov Ulysmedia.kz basylymyna bergen suhbatynda bul isti jýrnalısi qýdalaý emes, óziniń iskerlik bedelin qorǵaý áreketi dep baǵalaıtynyn aıtty.

«Qazir qoǵamda meni jýrnalısi sotqa súıregen adam retinde kórsetip jatyr. Biraq meniń maqsatym eshkimdi qýdalaý emes. Men tek ózimniń atymdy, bedelimdi jáne kásibimdi qorǵaýǵa tyrysyp júrmin», – dedi kásipker suhbat barysynda.

Kompanıa ataýy qoǵamǵa dál osy daýdan keıin keńinen tanyla bastady. Buǵan deıin áleýmettik jeliler men birqatar medıada Botagóz Omarovany qoldaıtyn materıaldar jıi jarıalanyp, isti sóz erkindigine qysym retinde baǵalaǵan pikirler basym boldy. Al jýrnalıs úıqamaqqa alynǵannan keıin qoǵamda «VD Injınırıń» kompanıasynyń qyzmeti, onyń quryltaıshylary jáne mıllıardtaǵan teńgeniń ınfraqurylymdyq jobalaryn qalaı alyp júrgeni týraly túrli zertteýler men boljamdar kóbeıdi.

Azamat Úsimbekovtiń aıtýynsha, kompanıa birneshe jyl boıy qurylys jáne ınjenerlik jobalarmen aınalysyp keledi. Ol bıznestiń qalyptasýy ońaı bolmaǵanyn aıtyp, túrli tekseris pen kúmánniń arasynda jumys isteýge týra kelgenin jetkizdi.

«Áleýmettik jelide nemese keıbir materıaldarda aıtylǵan aqparattar bizdiń kompanıanyń bedeline áser etti. Seriktesterimiz suraq qoıa bastady. Otbasyma deıin qysym sezindi. Osyndaı jaǵdaıda zań aıasynda óz quqyǵymdy qorǵaýǵa májbúr boldym», – dedi ol.

Kásipkerdiń sózinshe, qoǵamda taraǵan keıbir málimetter shyndyqqa sáıkes kelmeıdi jáne olardy teksermeı jarıalaý úlken saldarǵa alyp kelýi múmkin.

«Jýrnalısıka – úlken jaýapkershilik. Kez kelgen aqparat naqty dálelge súıenýi kerek dep oılaımyn. Eger adamnyń abyroıyna nuqsan kelse, onyń da qorǵanýǵa quqyǵy bar», – dedi Úsimbekov.

Sonymen qatar suhbat barysynda ol kompanıanyń qysqa merzim ishinde iri ınfraqurylymdyq jobalarǵa shyǵýyna qatysty suraqtarǵa da jaýap berdi. Onyń aıtýynsha, barlyq kelisimsharttar zań aıasynda jasalǵan jáne memlekettik satyp alý rásimderinen ótken.

Al Botagóz Omarova qazirgi tańda tergeý sheńberindegi shekteýlerge baılanysty jaǵdaıǵa ashyq pikir bildire almaı otyr. Sondyqtan qoǵamda bul iske qatysty birjaqty pikir qalyptasyp ketkenin aıtqandar da bar.

Áleýmettik jelilerde atalǵan iske baılanysty pikir ekige bólingen. Bir tarap jýrnalıserge qysym kórsetilip jatyr dep eseptese, endi biri jalǵan aqparat úshin jaýapkershilik bolýy kerek degen ustanymdy alǵa tartady. Keıbir medıa sarapshylar bul jaǵdaı Qazaqstandaǵy sóz bostandyǵy men quqyqtyq mádenıetke qatysty mańyzdy testke aınalǵanyn aıtýda.

«Bul is bir ǵana jýrnalıs pen kásipker arasyndaǵy daý emes. Munda qoǵam úshin mańyzdy birneshe másele qatar tur: jýrnalısıkanyń jaýapkershiligi, aqparattyń anyqtyǵy jáne azamattardyń óz bedelin qorǵaý quqyǵy», – dep jazýda jeli qoldanýshylary.

Osylaısha Botagóz Omarovaǵa qatysty is qoǵamdaǵy eń kóp talqylanǵan taqyryptardyń birine aınalyp, medıa keńistiktegi jaýapkershilik pen erkindik arasyndaǵy tepe-teńdik týraly pikirtalasty qaıta kúsheıtti.