InfoHub Logo

Aqtóbe oblysy Áıteke bı aýdany
Tereńsaı jalpy orta bilim beretin mektebiniń
8 synyp oqýshysy Turǵan Fatıma

Sen meni bilesiń be, bilesiń be,

Búginde kim ósýde, kim óshýde.

Muqaǵalı aqynnyń jyr marjandarynyń ishinde osyndaı joldar bar. Aqyn tastaǵan saýalǵa bilmeımin desem, onyń rýhy keshirmes pe edi. Árıne, bilemin.

Osydan segiz jyl buryn mektep tabaldyryǵyn attaǵan sátimnen bastap-aq Marjan apaıymnyń:

                               Mektebiń  mynaý klasyń,

                               Osynda on jyl turasyń.

                                Tarydaı bolyp kiresiń,

                                Taýdaı bolyp shyǵasyń -

dep, aqyn jyrymen birinshi synypqa qabyldaǵany sanamda jańǵyryp tur. Sol sátten bastap - aq Muqaǵalı óleńderin jattap, boıyma sińirip kelemin. Ýaqyt  alǵa jyljyǵan saıyn óleńge degen qushtarlyǵym arta túskendeı. Iá, keshe ǵana tulymshaǵymda aq bantıgim jelbirep, tarydaı bolyp kirip,  taýdaı bolyp shyǵatynymdy oılasam, tula boıymdy beıne bir jumbaq álem bılegendeı bolady. Erteń ómirdiń bir kishi bolyp qalanatynym  haq. Aqyn jyrlarynyń qaısysyn oqysań da , tereń ıirimine tartyp, óleń qushaǵyna qalaı kirip ketkenińdi sezbeı de qalasyń. Oqyǵan saıyn bir jańalyq ashqandaı marqaıyp, shattanasyń.                                                                                       

Muqaǵalı óleńderi eń aldymen, ózin myna bizdi ǵajaıyp bir sıqyrly sezimge bóleıdi.  Aqyn ómirin poezıasyz elestetý múmkin emes. Ol óz ómirin óleń áleminen tapty. Onsyz oǵan baqyt ta, qýanysh ta, tipti, qaıǵy-muń da joq. Onyń ishki jan-syryn poezıa arqyly tanısyń.

Aqyn shyǵarmalarynan adamgershilik, súıispenshilik, tabıǵat, týǵan jer, Otan, til, otbasy, ómir jaıly oqyp ózińe nár alasyń. «Úsh baqytym» óleńinde ana tilin týǵan halqynan, Otanynan áste bólip jarmaı biregeı qaraýynan qýat alyp, patrıottyq sezimge bólenesiń.                                                                                                                

Ol jalyndap ótken 45 jas ǵumyrynda ómir súrgen qoǵamǵa muńaıyp, kóńili túskenmen de keleshekten  úmitin úzbedi. Ómirdiń qıyn sátteri basyna qara bult tóndirse de, artynan jarqyrap kún shyǵatynyna ılandy.

Úzbeımin kúderimdi jaryqtan men,

Úzbeımin kúderimdi halyqtan men -

dep,  úmitin úzbedi. Ol ózi ómirden ótse de keıingi urpaqtary jyrlaryn súıip oqyp, ómirden óz baǵasyn alatynyna kámil sendi. Aqyn ózin:                                                                                   

                                     «Ólse óler Muqaǵalı Maqataev,                                                                                                      

                                     Óltire almas alaıda óleńdi eshkim»,-    

 dep, óleń áleminde eshqashan ólmeıtinin, óleńmen ómir keshetinin , jas urpaq óleńderin jattap , ánderin kók aspanda  asqaqtata shyrqaıtynyn aqyndyq túısigimen seze bilgenin baıqaımyz.

Qoryta kele, búginde aqyn óz arman-maqsatyna jetti dep qabyldaımyz. Muqaǵalı óleńderi ólmeıtin, óshpeıtin máńgilik muraǵa aınaldy. Iá, aqyn aǵa:

                                       Senim artyp keleshek urpaǵyńa,                                                                                    

                                       Jyr marjanyn sanaǵa quıasyń da,                                                                                                   

                                      Halqyńyz sizben birge máńgi bolyp,                                                                                                      

                                      Úmitińdi aqtaıdy urpaǵyń da,-

dep, óz oıymdy júregimnen jaryp shyqqan jyr joldarymmen aıaqtaımyn.

---