InfoHub Logo

Belgili qazaqstandyq aktrısa Merýert Ótekesheva "Qyz Jibek" fılminiń tarıhı kamzolyna qatysty daýly jaǵdaı men prodúser Baıan Maqsatqyzynyń aı saıyn 1 mıllıon teńge tóleý týraly ýádesine qatysty pikirin bildirdi. Bul týraly Infohub.kz aqparat agenttigi habarlaıdy.

Aktrısanyń aıtýynsha, fılm túsirilimi kezinde kóptegen kostúmder joǵalǵandyqtan, ol kamzoldy izdemegenin aıtty. Kamzoldy kıip kórgen Baıan Maqsatqyzynyń áreketine qatysty pikir bildirgen Ótekesheva, onyń muny eshkimdi renjitý maqsatynda jasamaǵanyn, kerisinshe, tarıhı zatqa degen shynaıy qyzyǵýshylyqtan istegenin atap ótti. Kamzoldyń mýzeıge tapsyrylýy múmkin ekenin de aıtty.

Merýert Ótekesheva sondaı-aq Baıan Maqsatqyzynyń ýáde etken 1 mıllıon teńgege qatysty máselege toqtaldy. Aktrısanyń sózinshe, ázirge ekeýi bul taqyrypty talqylamaǵan, biraq Baıan Maqsatqyzynyń shyǵarmashylyq adamdarǵa qoldaý kórsetý nıetin túsinetinin jetkizdi.

Buǵan deıin Baıan Maqsatqyzyna "Qyz Jibek" fılminiń aty ańyzǵa aınalǵan kamzoly syıǵa tartylǵan bolatyn. Bul jaǵdaı áleýmettik jelilerde qyzý talqylanyp, keıbir azamattar mundaı qundy jádigerdiń jeke adamnyń qolyna túskenine narazylyq bildirse, endi bireýler onyń ásemdigin maqtap, senimdi qolda ekenin aıtty. Mádenıet mınıstrligi de bul máselege qatysty tekserý júrgizetinin habarlaǵan edi.

Keıinnen Baıan Maqsatqyzy kamzolǵa qatysty daýlarǵa baılanysty jańa málimdeme jasap, aktrısaǵa syılyq retinde ton beretinin jáne oǵan aı saıyn 1 mıllıon teńge kóleminde «ómir boıy rızashylyq» tóleıtinin aıtty.