InfoHub Logo

Qazaqstandyq mánerlep syrǵanaýshy Mıhaıl Shaıdorov Mılan-Kortına 2026 qysqy Olımpıadasynda alǵan altyn medaline kıgen kostúmin Mılandaǵy Olımpıada murajaıyna syıǵa tartty. Bul – Táýelsiz Qazaqstan tarıhyndaǵy qysqy sport túrlerinen shyqqan ekinshi Olımpıada chempıonynyń tarıhı kıimi.

Bul týraly Infohub.kz aqparat agenttigi habarlaıdy.

Saltanatty shara Mılandaǵy kónkımen júgirý kesheninde ótti. Kostúmdi Qazaqstan Ulttyq Olımpıada komıteti (UOK) ókilderi qabyldap aldy. Bul kıimdi qazaqstandyq dızaınerler arnaıy Olımpıada oıyndary úshin tikken. Ol ǵaryshty beıneleıtin tereń kók tústi jáne «Besinshi element» fılminiń atmosferasyn eske salatyn áshekeılermen bezendirilgen.

Sport áleminiń mańyzdy tulǵalary kýá boldy

Syıǵa berý rásimine Halyqaralyq mánerlep syrǵanaý federasıasynyń prezıdenti Kım Chje En, Olımpıada murajaıy dırektorynyń orynbasary Iasmın Maıhtrı jáne Qazaqstan Ulttyq Olımpıada komıtetiniń prezıdenti, álemge tanymal boksshy Gennadıı Golovkın qatysty.

Gennadıı Golovkın bul is-sharanyń mańyzdylyǵyn atap ótip, Mıhaıl Shaıdorovtyń bul syılyǵy jas sportshylarǵa úlgi bolaryn aıtty. «Bul kostúm mıllıondaǵan adamdarǵa chempıonymyzdyń jetistigin kórýge múmkindik beredi. Ol jas býyndy armandaýǵa jáne óz kúshterine senýge shabyttandyrady», – dedi Golovkın.

Shaıdorov: Bul armanymnyń bir bóligi

Mıhaıl Shaıdorov bul qadamdy ózi úshin erekshe qurmet dep sanaıtynyn jetkizdi. «Meniń armanymnyń bir bóligi endi álemdik olımpıadalyq muranyń qataryna qosyldy. Bul kostúm olımpıadalyq joldaǵy qıyndyqtar men jeńisterdiń sımvoly bolsyn. Ol árbir sportshynyń úlken Olımpıada tarıhynyń bir bóligi bola alatynyn kórsetsin», – dedi mánerlep syrǵanaýshy.

Eske sala keteıik, Mıhaıl Shaıdorov 2026 jylǵy qysqy Olımpıada oıyndarynda mánerlep syrǵanaýdan altyn medaldi jeńip alyp, Qazaqstan tarıhyndaǵy qysqy sport túrlerinen ekinshi Olımpıada chempıony atandy.