InfoHub Logo

Tanymal ánshi Móldir Áýelbekova shetel saparynan oralǵanda eki úlken chemodanynyń joǵalǵanyn aıtyp, jankúıerlerin eleń etkizdi. İshinde 10 mıllıon teńgege jýyq baǵaly zaty bar ekenin aıtqan ánshi, bul jaǵdaıǵa qatty kúıingenin jetkizdi.

Bul týraly Infohub.kz aqparat agenttigi habarlaıdy.

Shyǵynǵa ushyrap, kóz jasyn buǵa almaı qaldy

Ánshiniń aıtýynsha, joǵalǵan eki chemodanynda brend sómkeler, aıaqkıimder jáne ózimen birge alyp júretin altyn salatyn qoraby da bolǵan. Bul jaǵdaıdan keıin ánshi «bir jylap aldym» dep, kóz jasyn súrtip, aldaǵy gastróldik saparyna shyǵyp ketkenin aıtty. Ol kórermenderiniń qoldaýymen kóńilin kóterýge tyrysqanyn jetkizdi.

Júk tabylyp, qýanyshqa keneldi

Arada eki kún ótken soń, Móldir Áýelbekovanyń qýanyshty jańalyǵymen bólisti. Onyń joǵalǵan eki chemodany Bangkok áýejaıynan tabylyp, Almatyǵa jetkizilgen. Ánshiniń aıtýynsha, zattarynyń eshqaısysy joǵalmaǵan, bári ornynda bolyp shyqty.

«Alaqaı! Eki chemodanym Bangkoktan tabyldy! Almatyǵa jetkizildi! Joǵalǵanda zeket, sadaqam túgel, nege bulaı boldy eken dep, san túrli oı mazalap edi… Endi, ashyp qarasam bir de bir zatym joǵalmaǵan! Barlyǵy ornynda! Qýanyp otyryp ishindegi biraz zatymdy tarattym! Allaǵa sansyz shúkir!» – dep jazdy ánshi.

Osylaısha, ánshiniń júk máselesi sátti sheshilip, ol shúkirshilik aıtyp, qýanyshyn jankúıerlerimen bólisti.