InfoHub Logo

Qostanaı oblysy Áýlıekól aýdany
№121 Qusmuryn orta mektebi
9-A synyp oqýshysy Gılázıtdınova Natalá
Jetekshisi: qazaq tili men ádebıeti pániniń muǵalimi Jantilesova Madına Hamzaqyzy

«Ustazdyq etken jalyqpas, úıretýden balaǵa» dep Abaı atamyz aıtqandaı, ustaz eńbeginiń qyr-syry mol. Bul  qıyn da jaýapty, shyǵarmashylyq eńbek ekendigin barshamyz moıyndaımyz. Sondyqtan men úshin muǵalim – eń mártebeli, qurmetke laıyq mamandyq.

Meniń túsinigimdegi  muǵalim – rýhy taza, oı – órisi bıik, ulty men Otanynyń bolashaǵy úshin ter tógip, shydamdylyq pen ta­bandylyqtyń úlgisin kórsetýshi, ja­ńa­shyldyqtyń bastaýshysy, jú­re­gi – jyly, kóńili – darqan adam.

Barlyq uly adamdar muǵalim aldynan ótken, bilim alǵan, úlgi-ónege kórgen. Olardyń bári ustaz aldyna bas ıgen. Ustazdar shákirtterge týǵan balasyndaı qarap, aqyl aıtyp, bilim nárimen sýsyndatyp, ońy men solyn tanytady. Ár balanyń kóńilin taýyp, jaǵdaıyn jasap, qamqorlyq  kórsetedi. Balalar muǵalimine zor qurmetpen qarap, óziniń ishki syrlarymen ashyq bólisedi. Ustaz jeke ýaqytyn aıamaı, barlyq bilimin, jan-dúnıesin, meıirimin oqýshylarǵa beredi. Tipti ómirden óz ornyn tabýǵa da kómektesedi.

Mektep qabyrǵasynda biz kóptegen pánderdi oqımyz. Men úshin eń mańyzdy pán – qazaq tili. Qazaq halqy talaı jyldar boıy ańsaǵan táýelsizdigine qol jetkizgeninen beri kóptegen armandar oryndaldy. Sonyń jarqyn kórinisiniń biri bizdiń elde memlekettik til - qazaq tili.

Men – Gılázıtdınova Natalá, qasıetti Áýlıekól aýdanynyń ataqty ǵalym Shoqan Ýálıhanovtyń týǵan jeriniń týmasymyn. Ultym tatar bolsa da, júregim únemi «qazaq» dep soǵady. Men oqıtyn toǵyzynshy synybym kóp ultty, biraq bárimiz óte tatýmyz, árqashan bir-birimizge qol ushyn sozamyz.

Memlekettik tildi jaqsy deńgeıde meńgerýim qazaq tilinen sabaq beretin muǵalimim - Madına Hamzaqyzynyń eńbegi dep bilemin. Ol bizge qazaq tilin birinshi synyptan berip kele jatyr. Oqýshylaryna únemi aqyl aıtyp, jón siltep otyrǵan ustazymyzdyń sózi biz úshin altynnan da baǵaly .  

Múmkin sondyqtan muǵalimime eliktep, soǵan qatty uqsaǵym kelip, men  keleshekte joǵary oqý ornyna túsip, qazaq tili pániniń mamany bolýdy armandaımyn. Joǵary oqý ornyn aıaqtap, óz aýylyma oralyp, kishkentaı búldirshinderdi qazaqsha oqytqym keledi. Muratyma qol jetkizý jolynda ózime qazaq tilinde jetik sóıleý degen maqsat qoıdym. Bos ýaqytymda qazaqsha ánderdi shyrqaýdy, óleńderdi jatqa aıtýdy, ádebı shyǵarmalardy oqýdy unatamyn. Súıikti aqyn- jazýshylarym -  Muqaǵalı Maqataev, Sáken Seıfýllın, Muhtar Áýezov, Qalqaman Sarın.

Jazda memlekettik tildi jaqsy biletin,  úzdik oqýshylarǵa arnalǵan demalys ornyna bardym. Birneshe jyl boıy qazaq tili páni boıynsha respýblıkalyq olımpıada, baıqaý, saıystarǵa únemi qatysamyn. Bıylǵy jyldyń qyrkúıek aıynda Qostanaı qalasyna baryp, «Myń bala» baıqaýyna qatystym. Jeńiske jetpesem de, baıqaýdan qanattanyp keldim. Óıtkeni jańa dostarymmen tanysyp, olarmen qazaq tilinde  sóılesip, erekshe sezimderge bólendim. Jeltoqsan aıynda aýdan boıynsha pándik olımpıadanyń bas júlde ıegeri atandym. Osyndaı jetistikterimmen memlekettik tildiń órkendeýine shaǵyn bolsa da, úlesimdi qostym.

Memlekettik tiline degen qurmetim qazaq halqyna degen qurmetim dep túsinemin. Qazaqstanda turatyn ózge ult ókilderi qazaq halqynyń mádenıetin, tarıhyn, ádebıetin, tilin bilýge mindetti degen sózdermen oıymdy aıaqtaǵym keledi.

---