InfoHub Logo

Óńezdengen sańyraýqulaq, nemese qarapaıym tilmen aıtqanda óńez - álemde eń kóp taralǵan sańyraýqulaqtyń túri. Oǵan dym bolsa jetkilikti. Sondyqtan sizdiń úıińiz ben páterińizdegi birneshe qubyrdan sý aqsa nemese qubyr tesilip, sý tamshylap tursa, bul óńezdiń paıda bolýyna óte yńǵaıly jaǵdaı jasaıdy. Óńezdiń keıbir túrleri turǵyn jaıǵa ǵana emes, sonymen qatar adamnyń densaýlyǵyna da zıandy.

Myna az ǵana belgilerge nazar aýdaryńyz: olardyń árqaısysynan baıqasańyz, sizdiń úıge de óńez paıda boldy dep dabyl qaǵýǵa bolady.

Sý tamshylap tursa...

Qubyrlardan sýdyń tamshylap turý máselesi tipti jańa salynǵan úılerde de kezdesip jatady. Úıińizdi jiti baqylańyz: qabyrǵaǵa nemese tóbeden sý tamshylap turǵanyn baıqadyńyz ba? Baıqasańyz, onda sizdiń úıińizdiń bir buryshynda mindetti túrde sańyraýqulaq ósip turýy múmkin.

Iis

Óńezdiń qolaısyz, kógergen dym ısi óte jyldam taralady. Barlyq bólmelerdi aralap shyǵyp, óńezdiń negizgi oshaq kózin tabýǵa bolady. Eshteńe kórmeı tursyz ba? Endeshe, túsqaǵazdy qoparýǵa týra keledi. Keıbir kezde sańyraýqulaq qabyrǵanyń ishinde de ósip shyǵýy múmkin.  

Býlanǵan tereze

Terezeniń býlanýy dymnyń artýynan paıda bolady. Kóp adamdar terezeniń únemi býlanyp turǵanyna úırenip ketedi de, nazar aýdarmaıdy. Bul beker. Mundaı jaǵdaı úıde sańyraýqulaqtyń paıda bolǵanyn bildiredi.

Kózdiń qyshyp dýyldaýy jáne tamaqtyń isinýi

Qysta mundaı jaǵdaıdy jeńil sýq tıip qalýy dep qabyldaýǵa bolady. Degenmen, kózdiń qyzarýy, tamaqtyń isinýi murynnyń shyryshty qabyǵynyń aýyrýymen astassa oılanyńyz. Munyń sebebi sańyraýqulaqtan paıda bolǵan alergıa bolýy múmkin.

Tynys alý organdarynyń aýrýlary

Osyndaı jaǵdaılar aýyr jótelge, keýdede syryl paıda bolýyna alyp kelýi múmkin. Sańyraýqulaqtardyń keıbir túrleri adamdy loqsýǵa deıin jetkizedi, bul jaǵdaı adamnyń astmamen aýyrýyna ákelip soqtyrady.

Keýdeniń shaǵyp aýyrýy

Keýdeniń shaǵyp aýyrýy – sańyraýqulaqtan paıda bolatyn alergıanyń basty sebebi. Sýyq tıip aýyrǵannan emdelip bolsańyz, keýdeńiz áli shaǵyp aýyryp júrse úıińizdi qarap shyǵyńyz. Sebebi, bul sańyraýqulaq keseli bolýy múmkin.

Qaýiptiń qaıtyp kelýi

Óńezdi tazalap bolǵannan keıin úıdi únemi tekserip otyrý kerek. Óńez as úıdegi qol jýǵyshtyń astynda paıda bolýy yqtımal.

Arnaıy mamandardy shaqyrýǵa bola ma?

Joǵaryda keltirilgen aqparattardan keıin óńez aýyr alergıalyq reaksıalarǵa alyp keletinin túsindik. Eger ol reaksıalar sizdiń boıyńyzda paıda bolsa, arnaıy mamandanǵan qyzmet túrin shaqyrýǵa bolady. Óıtkeni, ózińizdiń densaýlyǵyńyzdy qaýipti jaǵdaıǵa qaldyrýǵa bolmaıdy. Eger densaýlyǵyzda aqaý bolmasa, onda sańyraýqulaqtan óz kúshińizben qutylýǵa múmkindik bar.

Óńezdi ózińiz qalaı jeńe alasyz?

Óńezdi qorǵaný quraldarynyń kómeginsiz tazalaýǵa bolmaıdy. Respırator, kózildirik, qolǵap – osylar jetkilikti. Óńezdi jýatyn ertindini daıyndaý qarapaıym: hlordy sýǵa 1:3 mólsherde eritip, sodan keıin qatty shetkamen uqyptap tazalańyz. Tazalanǵan jerdi taza sýmen taǵy bir jýyp shyǵyńyz da fenmen uqyptap keptirińiz.

---