InfoHub Logo

- Nege urma dep aıtpaısyń? Aǵaı, urmańyz, urýǵa qaqyńyz joq dep aıtsaıshy. Qalanyń baldary bolsa ǵoı, sazaryp turyp alar edi, "aǵaı, urmańyz, urýǵa qaqyńyz joq" dep. Senderdiń osy minezderiń jaqsy.

Biraq búgingi buzyqtyǵyń bar ǵoı...

Men seni áke-shesheńniń kózinshe sabap ala alamyn ǵoı. Áke-shesheń qolymnan ala almaıdy seni. Ákeń qurdasym ǵoı.

Ákeń qaıda, aıtpaqshy?! Úıde deıdi? Jumys qaıda?! Aıaǵyna aıyr kirgizip aldy?! Rezeńke etikten kirip ketip júr me aıyr? Ákeńniń
kózi nasharlaıyn degen be, ne?

Ákeńe aıt, shóbimdi ákep bersin! Aǵaı aıtyp jatyr de. Shóbimdi ákep bersin dep jatyr de. Úıge barǵan soń qulaǵyn bura papańnyń.

Aıtpaqshy, kólikti seniń óziń de urshyqsha úıiredi ekensiń ǵoı. Onda sen ákep ber shóbimdi.

"Bes" deıdi?! E, bala, aýzyńdy keń ashpasaıshy. Sen áýeli "tórt" surasaıshy. Men seni "úshke" áreń úlgertip júrmin ǵoı. Erteń saǵan "bes" qoıyp jatsam, jurt aıtpaı otyrmaıdy, qurdasynyń balasyna "bes" qoıyp jatyr dep.

Sen óziń ómirge qarasaıshy kóz júgirtip. Adamdar degen kishkentaı-kishkentaıdan urlaıdy aldymen, kishkentaı-kishkentaıdan kóshirip alady. Sosyn baryp marqum bolyp ketken ulylardyń eńbegine aýyz salady. "Jatqan jerleriń jaıly bolǵyrlar, bizge sharapattaryń tıip jatsyn". Tutasymen kóshirip alady.

Adam degen sóıtip-sóıtip eńbektenedi ǵoı, sóıtip-sóıtip júrip izdenedi.

Baıaǵyda úsh qyzdan keıin sen týǵanda, biz nege qýandyq deısiń? Óńkeı qurdastar bolyp seniń úıińde neshe kún toı jasaǵanbyz, ákeńdi ortaǵa alyp. Sodan qoı, shyǵaıyq dep, ákeńdi ertip alyp shyqqanymyzda, besikte jatqan seni besigińmen qosyp ala ketippiz. Shesheń aıaǵyna gálóshti ile salyp, eki ókpesin qolyna alyp, eńkildep qýyp jetken sonda.

"Jyndysyńdar ma, balany ala ketkenderiń ne?" deıdi.

"Aý, júre bersin bizben birge. Kóre bersin ómirdiń qandaı bolatynyn osy bastan".

Sonda syrtta 30 gradýs aıaz. Qyńq etip aýyrmapsyń. Nege aýyrady ekensiń?! Nıet durys bolyp tur ǵoı. Bárimiz sen ómirge keldi dep, seniń ústińe túsip ketkeli júrmiz. Adamnyń nıetine baılanysty ǵoı bári. Nıet durys bolyp tursa, jamanshylyq sheginedi.

Sóıtip ómirge kelgen balasyń ǵoı sen degen. Endi mynaý - aǵaıyńnyń shóbin ákelip berýge jaraǵaly tursyń.

Biraq búgingi buzyqtyǵyń bar ǵoı...

Biz saǵan jaman bolsyn dep aıtpaımyz. Áke-shesheń de sony aıtady. Sen úmit kútip otyrǵan balasysyń ǵoı.

Qazir qaıt úıińe. Ákeńe eskert shóp týraly. Ana qoradaǵy jalǵyz sıyrdyń sútine qarap otyr shıetteı bala. Aǵaıyńnyń jalǵyz aılyǵy ne bolady?! Sóıtińder, shóbimdi ákelip berińder.

---