Jaralǵan qalaı ǵajap mynaý aspan,
Qaz baýyr aq torǵyndaı bult basqan.
Jaltyrap gaýhar tastaı kókte juldyz
Qaraǵan muńdylardyń kóńilin ashqan.

Tolqıdy shóp bastary soqqan jelden,
Aı-daǵy nuryn shashty shyǵyp belden.
Jelmenen emis-emis estiledi,
Daýysy tóbetterdiń úrgen elden.

Tep-tegis bul ýaqytta uıyqtaǵan el,
Bul sorly japa-jalǵyz astynda bel.
Kóńilge árbir túrli qıal salyp,
Súıedi betinen kep oınaǵan jel.

Qapaly, móldiregen kózde jasy,
Kóz salyp eldi baıqar sorly basy.
Kózine bolar-bolmas kórinedi,
Búgjeńdep qyz ańdyǵan aýyl jasy.

Óńi joq, turǵandaı-aq jańa dertten,
Aırylǵan munsha neǵyp sorly etten?
Zyǵyrmen qaınap shyqqan kózden jasy,
Beıne bir merýert edi aqqan betten.

Osylaı jalǵyzdyqty dármen etip,
Otyr edi ár túrli oıǵa ketip.
Yǵynan bir tóbeniń kórinis berdi,
Aıtysqan ýádesine o da jetip.

Balbyrap qyzyl gúldeı otyrǵan jas,
Kóńilinde oı, tilep aqqan kózinde jas.
Bul rıza qylysh ustap qarsy alýǵa,
Jolymda túzýliktiń ketse de bas.

Túregep qadam basty qońyr qazdaı,
Umytyp kórgen beınet ala jazdaı.
Jolyǵyp bul mınýtte ne istedi:
Oqýshy túser ózi men de jazbaı.

---