InfoHub Logo

Álibaı degen kisi Qoıandy jármeńkesine kele jatady. Mingeni kúzeýli baıtal eken. Onyń artynan eki jigit qýyp jetip, keketińkirep sálem beredi. Álibaı sálemin alyp:

— Jigitter, joldaryń bolsyn! — deıdi. Mingenderi semiz at, kerbez kıingen eser jigitter ázildep:

— Aqsaqal, jol bolmaq sizden bolsyn. Bárimizdiń barar betimiz bir eken. Biz myna bazarǵa bara jatyrmyz. Árkim baryn bazarǵa salady ǵoı, alǵashqy saýda raqym degen, baıtalyńyzdyń quıryǵynyń qadaǵyna ne suraısyz? — deıdi.

Álibaı eki jigittiń óńine kóz qıyǵyn tastap tanıdy, bireýi Jabylbaıdyń balasy Aqan, ekinshisi belgili oıynshy Zárýbaı eken. Bul ekeýiniń de muryndary qońqaıǵan, ıilgen doǵadaı jotaly eken.

— Jigitter, bazarlas bolaıyq degenderiń durys-aq. Árkim óz dúnıesin bazarlaıdy ǵoı. Meniń baıtalymnyń quıryǵyna ustap ýys tolmaıdy, ólshep tarazy qýanbaıdy. Saýda bolǵan soń ónimdi dúnıege bolsyn. Ekeýińniń muryndaryńnyń qadaǵyna ne suraısyńdar? — deıdi. Álibaı osyny aıtqanda-aq anaý ekeýi bir qyrsyqqa kezdeskenin sezip, attaryn tebinip oza jóneledi. Álibaı da olardyń artynan qalmaı jortyp otyrady. Aqan men Zárýbaı ekeýi qoı bazaryna keledi. Kóp keshikpeı Álibaı da jetedi.

— Káni, jigitter, alǵashqy saýda raqym dep ózderiń aıtqandaı, meniń qolym jeńil, muryndaryńnyń qunyn kemitpeımin, — degende, eki jigit attaryn sabalap tura qashady. Álibaı taǵy arttarynan qalmaıdy. Olar jylqy bazaryna keledi, Álibaı taǵy qýa keledi. Eki jigit bazarǵa syımaı, Myńǵysh balasy Sádýdiń tikken úıine kelip tyǵylady. Bulardyń izine túsken Álibaı da ile qýyp keledi.

Álibaı kirip kelgende, Aqan men Zárýbaı qysylyp qozǵalaqtaı bastaıdy. Álibaı onan saıyn túıile:

— Káni, jigitter, meni zaryqtyrmańdar, alǵashqy saýda raqym dep ózderiń aıttyńdar. Myna Sádý myrzanyń aldynda keliselik, muryndaryńnyń naqtyly satylar baǵasyn aıtyńdar. Ákemiz Qazanǵaptyń toqal áıelinen týyp, jotaly shoqysy bar adyrly qonys tımeı qyrqa jotanyń zári ótip edi, táńiri kezdestirgen shyǵar. Keliseıik. Shirkin Aqannyń murnyn Qoıansoqqannyń jel jaǵynan ornatyp, Zárýjannyń murnynyq jaǵynan ornatyp, anaý muryn jaqtan tazyny ustap, túlki myna seńgirden shyǵa kelgende aıt dep qosyp jibersem, — dep taıaý otyrǵan Zárýbaıdyń qolaǵashtaı murnynan shap berip ustaı alypty. El qyran kúlki, Aqan men Zárýbaı kúlerin de, jylaryn da bilmeı:

— Áleke, aıyp bizde, ańdamaı sóılegen aýyrmaı óledi degen. Aıybymyz, — dep ekeýi bes somnan on som berip — endi osy sóz osy jerde qalsyn, eshkimge aıta kórmeńiz, — dep jalynypty.

— Aıtpaımyn, aıtyp ne qylaıyn. Biraq ekeýińniń myna murnyń aman bolsa, meniń sózime toqtaý bolar ma eken, — dep Álibaı júrip ketipti. Sol kúnniń erteńinde-aq muryn saýdasy Qoıandy jármeńkesine tarap úlgeripti.

---