InfoHub Logo

İlgeride bir ataqty ıshan bolypty. Baı men bekter ony qatty syılap, qurmet tutady eken. Qysqy soǵymnan ıshanǵa sybaǵa saqtap el qystaýdan jaılaýǵa bettep kóshkende, dáýletti aýyldar birinen soń biri shaqyryp, ıshanǵa qonaqasy beredi eken. Ishan túsken úıinde jurttyń kózine túspeý úshin otyrǵan jerge shymyldyq qurǵyzyp, tamaqty da sonyń ishine aldyryp ishedi eken.

Musa deıtin kedeı jigit el jaılaýǵa kóship jatqan kezde ústine ıshannyń kıimindeı kıim kıip, astyna sonyń atyndaı at minip, qasyna eki-úsh joldas ertip, bir baıdyń aýylyna attanypty. El orynǵa jańa ǵana otyryp jatqan qarbalas shaqta, baıdyń úıine kelip túsedi. Musa ıshannyń barlyq ádetin istep, eshkimge kórinbeı, shymyldyq ishinde otyrady. Baı báıek bop, ıshanǵa saqtaǵan sybaǵasyn asypty, barynsha syı-qurmet kórsetedi. Baıdan sybaǵa jep, alaryn alǵan Musa ishinen kúledi de, qosh aıtysyp, tún ishinde attanyp júrip ketedi. Erteńine baı aýylyna naǵyz ıshannyń ózi keledi. Buǵan ańtań bolǵan baı:

— Isheke-aý, nege tez oraldyńyz, sizdi kórshi aýyl kútip otyr edi ǵoı, — deıdi.

Bul sózge túsinbegen ıshan:

— Siz ne aıtyp tursyz, sizdiń úıge byltyrdan soń oralyp turǵanymyz osy emes pe! — depti.

Baı aldanǵanyn sonda bir-aq bilipti.

 

---