InfoHub Logo

Qazaqstannyń tuńǵysh prezıdenti Nursultan Nazarbaevtyń úlken nemere kelini Aıda Álıeva jaqyn adamynyń densaýlyǵyna qatysty áserli jazba jarıalady.

Bul týraly Infohub.kz aqparat agenttigi habarlaıdy.

Ájesiniń jaǵdaıy týraly

Darıǵa Nazarbaeva men Rahat Álıevtiń uly Nuráliniń jubaıy Aıda Álıeva qazirgi ýaqytta shetelde turatynyn, sondyqtan naýqas ájesiniń janynda kún saıyn bola almaıtynyn aıtty. Ol áleýmettik jelide ájesimen birge túsken sýretterin bólisip, qart kisige kútim jasap júrgen týystaryna alǵys bildirdi.

Aıda Álıevanyń sózinshe, onyń ájesi birneshe jyldan beri demensıa dertimen kúresip keledi. Alaıda, keı sátterde ol kisi erekshe sergip, oıyn anyq jetkize alatynyn jazdy.

«Bir ǵajaıyp bolady»

«Ájemniń birneshe jyldan beri demensıasy asqynyp barady. Kúndelikti ómirde ol kisi kóbine sóıleskisi kelmeıdi, tuıyqtalyp, uzaq ýaqyt únsiz qalýy múmkin. Biraq men «Aqmama, balalar men nemereler úshin vıdeo jazaıyqshy, sizdiń sózderińizdi saqtap qalý men úshin óte mańyzdy» desem, bir ǵajaıyp bolady. Ol kisi jınaqtalyp, jandanyp, sóıleı bastaıdy. Sondaı anyq ári túsinikti sóıleıdi, kóp adam onyń demensıamen aýyratynyna senbeıdi», – dep jazdy Aıda Álıeva.

Qamqorlyqtyń mańyzy

Ol sondaı-aq ájesiniń janynda kún saıyn óziniń tátesi, ıaǵnı naýqastyń kelini bar ekenin atap ótti. Álıeva muny úlkenderge degen shynaıy mahabbat pen qamqorlyqtyń úlgisi dep baǵalady.

Onyń aıtýynsha, qart adamdarmen qarym-qatynasta eń mańyzdysy – nazar, meıirim jáne qasynda bolý. Tipti egde jastaǵy adam sóıleskisi kelmese de, ony qushaqtap, qolynan ustap, janynda otyrýdyń ózi úlken qoldaý ekenin aıtty.

«Iá, keıde qart adamdarmen til tabysý ońaı emes. Biraq biz kishkentaı bolǵan kezde, bizben de árdaıym ońaı bolǵan joq qoı», – dep jazdy ol.

Jazba sońynda Aıda Álıeva alǵys pen mahabbattyń tek sózben emes, naqty áreketpen kórinetinin eske saldy.

«Alǵys bir-birimizge bóletin ýaqytpen, kóńilmen, qamqorlyqpen jáne jaı ǵana qasynda bolýmen ólshenedi», – dedi ol.