InfoHub Logo

Izraıl premer-mınıstriniń keńsesi áleýmettik jelide taraǵan Bınámın Netanáhýdyń qaza tapqany týraly aqparatty joqqa shyǵardy. Bul týraly Túrkıanyń Anadolu agenttigine bergen túsiniktemede atalǵan málimetterdiń "jalǵan jańalyq" ekeni aıtylyp, premer-mınıstrdiń jaǵdaıy jaqsy ekeni habarlanǵan.

Bul týraly Infohub.kz aqparat agenttigi habarlaıdy.

Deccan Chronicle basylymynyń jazýynsha, Netanáhýdyń qaza tapqany týraly qaýeset Taıaý Shyǵystaǵy shıelenistiń kúsheıýi aıasynda taraı bastaǵan. Ásirese AQSH pen Izraıldiń Iran aýmaǵyna jasaǵan soqqylarynan keıin áleýmettik jelide túrli rastalmaǵan málimetter kóbeıgen. Keıbir jazbalarda Izraıl premer-mınıstri óldi nemese joǵalyp ketti degen boljamdar aıtylǵan.

Vıdeodaǵy sátsiz kadr nemese vızýaldyq burmalaný

Bul áńgimeler 13 naýryz kúni Netanáhýdyń X áleýmettik jelisindegi resmı paraqshasynda jarıalanǵan vıdeoúndeýinen keıin odan ári kúsheıe tústi. Keıbir qoldanýshylar vıdeodan alynǵan bir kadrda premer-mınıstrdiń oń qolynda alty saýsaq bar sıaqty kórinetinin aıtyp, bul beıne jasandy ıntellekt kómegimen jasalǵan bolýy múmkin degen boljam taratqan.

Alaıda sarapshylar mundaı kórinis vıdeodaǵy sátsiz tańdalǵan kadr nemese vızýaldyq burmalaný saldarynan paıda bolýy múmkin ekenin aıtady. Iaǵnı bul jaǵdaı beıneniń jasandy ıntellekt arqyly óńdelgenin dáleldemeıdi.

Iran tarapynyń málimdemesi

Buǵan deıin Irannyń Islam revolúsıasy saqshylary korpýsy (KSIR) Netanáhýdyń taǵdyry belgisiz ekenin málimdep, onyń "qaza tapqan bolýy nemese otbasymen birge okýpasıalanǵan aýmaqtardan qashyp ketken bolýy múmkin" degen boljam aıtqan edi. Izraıl bıligi bul aqparatty shyndyqqa janaspaıdy dep málimdedi.