InfoHub Logo

XXV Qysqy Olımpıada oıyndarynda Norvegıa quramasy jalpy esepte birinshi oryn aldy. Biraq bul el sportshylaryna medal úshin aqshalaı syıaqy bermeıdi. Olardyń tabys formýlasy qandaı?

Bul týraly Infohub.kz aqparat agenttigi habarlaıdy.

Norvegıanyń jeńis formýlasy

Mılan men Kortınada ótken 2026 jylǵy Qysqy Olımpıada oıyndarynda Norvegıa quramasy 18 altyn, 12 kúmis jáne 11 qola, barlyǵy 41 medal ıelenip, birinshi oryndy ıelendi. Ekinshi orynǵa AQSH (12-12-9, barlyǵy 33 medal), úshinshi orynǵa Italıa (10-6-14, barlyǵy 30 medal) jaıǵasty.

Aqsha emes, júıeli qoldaý

Qyzyǵy sol, Norvegıada Olımpıada júldegerlerine birjolǵy aqshalaı syıaqy qarastyrylmaǵan. Onyń ornyna, sportshylar jylyna shamamen 17 myń dollar (8,4 mln teńge) kóleminde jyldyq shákirtaqy alady. Bul qarajatty birneshe jyl boıy alýǵa bolady. Forbes basylymynyń habarlaýynsha, norvegıalyqtar naqty nátıje úshin beriletin bonýsqa emes, daıarlyqty júıeli qarjylandyrýǵa, federasıalardyń jumysyna jáne sportshylardy uzaq merzimdi qoldaýǵa basymdyq beredi. Ulybrıtanıa men Irlandıada da osyndaı júıe qoldanylady.

Basqa elderdegi syıaqy

AQSH-ta altyn medal úshin 37 500 dollar (18,5 mln teńge), kúmis úshin 22 500 (11,1 mln teńge), qola úshin 15 000 (7,4 mln teńge) tólenedi. Oıyndardyń ıesi retinde Italıa altyn medal úshin shamamen 213 myń dollar (105,4 mln teńge) qarastyrǵan.

Salystyrmaly túrde, Qazaqstandaǵy syıaqy mólsheri joǵary: altynǵa – 250 000 dollar (123,7 mln teńge), kúmiske – 150 000 (74,2 mln teńge), qolaǵa – 75 000 (37,1 mln teńge). Bıylǵy Olımpıadada qazaqstandyq mánerlep syrǵanaýshy Mıhaıl Shaıdorov altyn medal ıelendi.