InfoHub Logo

Qaraǵandy oblysynyń Nura aýdanynda kezekte turǵan otbasylar ákimdik satyp alǵan jańa páterlerge kóshýden bas tartyp jatyr. Turǵyndar qabyrǵalardyń ylǵaldanyp, tereze sańylaýlarynan jel uratynyn, keı jerde kógerý paıda bolǵanyn aıtyp, qaýipsizdik pen búdjet qarjysynyń tıimdi jumsalýyna kúmán keltirdi.

Bul týraly Infohub.kz aqparat agenttigi habarlaıdy.

Turǵyndar nege kóshpeı jatyr?

Aýyl turǵyny Erkegúl Ǵumarova «Bul úı tegin berilmeıdi, aı saıyn aqsha tóleımiz. Biraq mundaı jaǵdaıda kishkentaı balalarmen turý qıyn» deıdi.

Kóp balaly ana Qyzǵaldaq Úshkelbaeva birneshe jyl boıy turǵyn úı kezeginde turǵan. Qazir ol bes balasymen Nurada eski baspanany aıyna 25 myń teńgege jaldap otyr. «Qurylysta qoldanylǵan materıaldyń sapasyna kúmánimiz bar», – dep málimdedi ol. Turǵyndar máseleni dáleldeý úshin foto-vıdeo da usynǵan.

Ákimdik ne deıdi?

Nura aýdany ákiminiń orynbasary Baqytjan Esjanovtyń aıtýynsha, úılerdi salǵan – jeke merdiger, al jergilikti bılik daıyn páterlerdi memlekettik satyp alý konkýrsy arqyly alǵan. «Konkýrs jarıalanady, eń tómen baǵa usynǵan qatysýshy jeńimpaz atanady. Bıyl tehnıkalyq tekserý mindetti túrde júrgiziledi», – dedi ol.

Ákimdik ókilderi nysandarǵa úsh jyldyq kepildik qarastyrylǵanyn da atap ótti.

Qansha qarjy jumsaldy?

Resmı málimet boıynsha, Nuradaǵy ár páter búdjetke shamamen 20 mıllıon teńgege túsken. Turǵyndar «satyp alardan buryn sapa nege jan-jaqty tekserilmedi?» dep suraıdy.

Oqıǵa 2026 jylǵy 7 qańtarda qoǵamdyq talqyǵa shyqty. Qazir aýyldaǵy jańa úılerge qonystaný máselesi ashyq qalyp, tehnıkalyq qorytyndyny kútip otyr.