InfoHub Logo

Áleýmettik jelide Otardaǵy áskerı bólimde jaǵy synǵan merzimdi qyzmettegi sarbaz Esbol Qapardyń jaqyndaryna jazǵan hattary tarap, qoǵamda qyzý talqylaý týdyrdy. Bul jaǵdaıǵa qatysty pikir bildirgen telejýrnalıst Gúlmıra Ábiqaı Otan qorǵaýǵa kelgen jastardyń mundaı qıyndyqtarǵa tap bolmaýy kerektigin aıtty.

Bul týraly Infohub.kz aqparat agenttigi habarlaıdy.

Jýrnalıstiń aıtýynsha, Gvardeısk garnızonynda bolǵan oqıǵaǵa qatysty sarbaz naqty tulǵalardy atap kórsetken. Alaıda, Qorǵanys mınıstrligi serjanttyń qatysy joq ekenin, bul eki sarbaz arasyndaǵy tóbeles bolǵanyn alǵa tartýda. Tipti, ekinshi sarbaz kinásin moıyndady degen aqparat ta bar. Oqıǵa kýágerleri de barshylyq. Biraq, sol kúni bólimdegi beınebaqylaý kameralarynyń isten shyqqany jaǵdaıdy kúrdelendirip otyr.

Sarbazdyń psıhologıalyq kúızelisi

Jelide jarıalanǵan vıdeoda sarbazdyń jaqyndaryna jazǵan hattary kórsetilgen. Onda Esbol Qapar aýyr psıhologıalyq kúızelispen ómir súrgenin ashyq aıtqan. "Asylyp ólgim keldi. Úıden jip izdep tappadym. Janym qatty qınaldy. Paketterdi baılap kórdim, biraq úzilip ketti", - dep jazǵan sarbaz.

Qazirgi tańda bul derek qoǵamda keńinen talqylanyp, resmı organdar oqıǵanyń mán-jaıyn anyqtaý úshin tekserý jumystaryn bastap ketti.