InfoHub Logo

A

Qamqor, dýagóı atam men áje, sizderge yqlasty sálemderimdi joldap qalamyn. Ózim sizderdiń oń batalaryńyzdyń arqasynda saý-salamat barmyn. Ótken pochtadan jibergen sálem hatyńyzdy, azyn-aýlaq aqshasymen, jolyǵyp aldym. Alla razy bolsyn, mendeı nashar balańyzdy esten shyǵarmaı turǵanyńyzǵa. Yqylasymmen Qudaı-taǵaladan tileımin: sizderdiń eńbek qamqorshylyǵyńyzdy bizge de qyzmetimizben óteýge jazǵaı edi dep. Oqyǵan oqýymyz týrasynda bul kúnde ustazdarymyz sonsha razy. Jańada eń jaqsy oqyǵan balalardyń esebine qosyp, kenegesine jazyp qoıdy. Ata, siz árqashan aqyl aıtýshy edińiz: «balam alań bolmaı ustazdaryńnyń aıtqanyn ornyna keltirip, bergen sabaqtaryn tolyq úırenip, bilýge tyrys» dep, men ol sózderińizdi umytqanym joq...

Siz jazasyz, ata, Qasenge qorasan4 shyqty dep. Aman jazylyp ketkenine qatty qýandym. Bizge ustazdarymyz aıtady: qorasandy egip shyǵarǵan balaǵa qaıta qorasan shyqpaıdy, shyǵa qalsa, qatersiz, jeńil shyǵady, — dep. Osy sózdi jóni kelse eskerip, jaqyn jerdegi lekarlerge5 kishkentaı inilerimdi aparyp, sheshek ektirgen qalaı bolady eken?

Qosh, daýalaryńyzdan úmitker balańyz N.

B

Aǵamyz Ybyraıǵa kóp sálemderimdi joldadym. Ózińnen kópten eshbir hat-habar bolmady. Tek aýrý syrqaýǵa dýshar bolmasań bolady-daǵy, sharýashylyq jumystan da qolyń tımeıtin shyǵar. Sóıtse de, ýaqyt taýyp, esendigińdi bildirgeısiń. Ózim denim saý, ustazdarymyzdyń táýir nazaryńdamyn. Bir-eki aıdan soń ekinshi klasqa shyǵarmyn degen úmitim bar.

Osy hatty tapsyrýshydan Qadıshaǵa eki qadaqtaı konfet jiberdim, sen alyp ózine tapsyra kór. Ákeme bas quldyǵymdy aıtyp jáne menen ótin, maǵan bergen aqshasyn bosqa shyǵardy dep uryspasyn. Qadısha kishkene bala ǵoı, aǵam jiberipti dep, qýanyp qalsyn dedim.

Qosh, aǵa, saý bol. Hat jaz degenimdi umytpa dep, — esendigińdi Qudaıdan tilep jazýshy inińiz N.

V

Minekeı, dostym Muratbaı, men ekinshi klasqa shyǵyp, endi bir-eki jumadan soń elge de qaıtýǵa turmyn. Endi kóp uzamaı-aq senderdi kórsem kerek. Osy kúnde - aq kózime elestep tur, aýyl kókoraı shalǵyndarǵa qonyp, jan-jaqtyń bári jelkildegen kók shóp ishinde jyńyldaǵan maldyń júrgenderi. Kóp jazýǵa ýaqyt joq qurby – qurdastaryma sálem, aǵama aıt: meniń kúreń dónenimdi kisige mingizbeı, semiz saqtasyn, barǵan soń ózim jaratyp jaılarmyn. Dostyń N.

G

Aǵamyz Ybyraıǵa sálem. Sen beker qaýip etesiń, meniń azyraq aýyrǵanymnan; seni kórip ájemderde úreı qalmaǵan-dy. Aýyrǵanym sebebi, qystyń kúni aýyly jaqyn jerdegi bir epteshimniń6 úıine qonaqqa baryp edim. Aǵash úı joq eken, kıiz úıde patshalyq jeńil kıimmen jatyp - turyp júrgende boıymdy sýyq ustady. Sonan azyraq basym aýyrǵan soń, qaıtyp dárigerge aıttym. Dáriger dári berip, endi jazylyp kelemin. Aı, aǵa, ákeme aıtyp, jyly aǵash úı salyp alsańyzshy. Kıiz úı jazdyń kúni qansha jaqsy bolsa, qystyń kúni sonsha jaman ǵoı. Sýyq kıiz úıde qys kúni búrisip, aldyń otqa jylynsa, arqań tońyp otyryp, ne taza jýynýǵa bolmaıdy, ne taza tamaq jeýge bolmaıdy. Osyndaǵy oqymysty dárigerler aıtady: qazaqtyń dertiniń kóbisi— ne boıyn sýyqqa aldyrǵannan, ne tazalyq joqtyqtan paıda bolady, — deıdi. — Qotyr, bórtken — taza bolmaǵannan, súzek, shanshý, jótel — bóri de sýyqtan, — deıdi. Erikken soń oıyma kelgenin jazyp, ermek etip jatyrmyn. Kóp myljyńdady dep aıypqa buıyrma jáne meniń úshin kelemin dep azaptanba. Ákem kári kisi, sharýashylyq jumysyńnan qalarsyń. İniń N.

---