InfoHub Logo

Qazaqstanda jalaqyny «konvertpen» berý dáýirine núkte qoıý úshin jasandy ıntellekt qoldanylatyn jańa júıe iske qosylady. Bul júıe, ásirese, alıment tóleýden jaltarǵan azamattardyń naqty tabysyn anyqtaýǵa kómektesedi. Mysaly, eger Astanadaǵy bilikti ınjener resmı túrde eń tómengi jalaqy alatyny kórsetilse, júıe bul jaǵdaıdy kúdikti dep belgileıdi.

Bul týraly QR Ádilet mınıstrligi býhgalterlerge arnalǵan arnaıy push-habarlamalar júıesin ázirlep jatqanyn málimdedi.

Bul máseleni Májilis depýtaty Magerram Magerramov «Atqarýshylyq is júrgizýdi jetildirý máseleleri týraly Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» zań jobasyn talqylaý kezinde kóterdi.

Depýtat 2016 jyly alıment qaryzynyń shamamen 2 mıllıard teńge bolǵanyn eske saldy. Al qazir Ádilet mınıstrliginiń derekteri boıynsha, bul kórsetkish 18 mıllıard teńgege jetken, bul tek úsh aıdan asqan qaryzdardy qamtıdy.

Magerramovtyń aıtýynsha, Qazaqstanda 300 myńnan astam bala alımentke muqtaj, olardyń arasynda múgedek balalar da bar.

Ádilet vıse-mınıstri Bekbolat Moldabekov qaryzdardyń naqty tabysyn anyqtaýǵa kómektesetin sıfrlyq tetiktermen jumys istep jatqanyn aıtty.

Jasandy ıntellekt arqyly tabysty anyqtaý

«Buryn qyzmetker konvertten aqsha alyp, 70 myń teńge alatynyn kórsetip, eń tómengi jalaqydan alıment tóleı alatyn bolsa, endi biz muny ózgertýdi kózdep otyrmyz. Jasandy ıntellekt bizge azamattyń, ınjenerdiń Astanada jumys isteıtinin, onyń 200 myń teńgeden az alýy múmkin emestigin anyqtaýǵa kómektesedi. Demek, qalǵan aqshany konvertpen alady degen sóz», — dedi Moldabekov.

Onyń aıtýynsha, Ádilet mınıstrligi Qarjy mınıstrligimen birlesip, býhgalterlerge arnalǵan push-habarlamalar ázirlegen.

«Biz olarǵa habarlama jiberip, sizdiń qyzmetkerińizdiń dıplomy men biliktiligine qaraǵanda jalaqysy tym tómen ekenin aıtamyz. Biz qosymsha aqshany konvertpen beresiz dep esepteımiz. Árıne, eshbir býhgalter salyq komıtetiniń tekserýine ushyraǵysy kelmeıdi», — dep qosty vıse-mınıstr.

Moldabekovtiń sózinshe, mundaı jaǵdaıda jumys berýshilerge qyzmetkerdiń naqty jalaqysyn kórsetý tıimdirek bolady, al alıment máselesin boryshker óz betinshe sheshetin bolady.

«Bizdiń mindetimiz – sıfrlandyrý, jasandy ıntellekt arqyly alımenttiń naqty somasyn alý jáne balalardyń bul aqshany ýaqytynda alýyn qamtamasyz etý», — dedi ol.

Alıment qaryzynyń ósýi

Buǵan deıin Ádilet mınıstrligi alıment boıynsha boryshkerlerdiń naqty tabysyn baqylaýǵa Memlekettik kirister komıtetin tartýdy usynǵan bolatyn. Vedomstvonyń túsindirýinshe, keıbir boryshkerler resmı túrde eń tómengi jalaqyny kórsetip, is júzinde odan kóp aqsha tabady. Osy sebepti balalarǵa tómendetilgen somadan alıment tólenedi.

Depýtat Magerram Magerramov alıment qory máselesin buǵan deıin de kótergen. Ol balalarǵa ýaqytynda tólem jasalýy úshin memlekettik alıment qoryn qurýdy usynǵan edi. Ol kezde depýtat keltirgen derekter boıynsha, 2023 jyly alıment qaryzy 20,7 mıllıard teńgeden asqan, al alıment óndirip alý týraly 8 myńnan astam sot sheshimi múldem oryndalmaǵan.

Qazirgi ýaqytta úsh aıdan asqan qaryzdyń kólemi 18 mıllıard teńgege jetkeni jáne 300 myńnan astam bala alımentke muqtaj ekeni aıtyldy.