InfoHub Logo

Luqpan ákimge bir sopysymaq adam bir jıylysta aıtty:

— Sizdiń aýrýǵa em etýińiz kúná, Qudaıdyń jibergen qaza - bálesine sebep tabamyn degen Qudaıǵa qarsylyq bolyp tabylady dep bilemin, — dedi.

Luqpan aıtty:

— Olaı bolsa, sol aıtqan sózińiz jazylǵan kitapty keltirińiz, senimdi kitap bolsa, biz toba etip, dárigerlikti qoıalyq, — dep.

Sopy bul sózdi esh kitaptan kórgeni joq kitap alyp kele qoıamyn dep qozǵalmady.

Jıylyp otyrǵan halyq shýlap qoıa berdi:

— Sopy, Luqpan jesirge baıdaı, jetimge atadaı bolyp, neshe muńdy beısharalardyń kóziniń jasyn tyıdy, sen bul isti kúná dep bilseń kitabyńdy kórset, bolmasa qazyǵa alyp baryp, jazalandyramyz, — dep.

İstiń bulaıynsha zoraıyp bara jatqanyn kórip, Luqpan halyqtan ótinish etip tysqa shyǵyp, sopyny ońasha qaldyryp aıtty:

— Alla razy bolsyn, moldam, bilgen shamańyzsha bizdi kúnádan tyıý úshin aqyl aıtqanyńyzǵa. Biraq bizden de sizge bir aqyl aıtylsyn: qashan da bir isti istegińiz kelse, ol iske áýeli aqylyńyzdy, onan soń kózińizdi jumsańyz, sonan soń aqylyńyz durystasa, kózińiz kórip, jónin tanyp, maqul kórse, tilińiz ben qolyńyzǵa sonda erik berińiz. Ekinshi, sizdiń aıtqan sózińizden oqyp jetispegendik kórinedi. Qudaı Taǵala adamǵa ártúrli dene berdi: qol berdi jumys qylmaq úshin, kóz berdi kórmek úshin, aıaq berdi júrmek úshin, qulaq berdi esitýge, aqyl berdi oılanyp, jaman - jaqsyny ańǵarýǵa. Sol bergen denelerdi tıisti ornyna jumsamasań, Qudaıdyń buıryǵyna qarsylyq bolyp tabylsa kerek. Onyń úshin júrmeı, turmaı, otyrmaı, kórmeı, esitpeı Qudaıǵa qulshylyq etip te bolmaıdy. Sol reýishti jansyz nárselerdiń de kereksiz jaratylǵany joq. Bir shópti ý etip jaratty, ekinshi shópti oǵan basytqy etip jaratty. Bulardy da tanyp, bilip, buıryqty ornyna jumsamasań kúnáli bolasyń, tıisti paıdaly ornyna jumsaýdan obal bolmasa kerek, — dedi.

---