InfoHub Logo

Jánibek batyr bala kúninde aqyl-bilim úırený úshin, Qarakereı Soqyrabyz degendi izdep kelgen eken. Sálem berip kirip kelse, qarttyqtan eki jaǵyn jibekpen tańyp otyrǵan kisi eken. Jánibekti kórip:

— Sen qaı ulsyń? — dedi.

— Qoshqar ulymyn, — dedi.

— Qoshqardyń adam esti bir uly bar dep edi, sol bolarsyń ba?—dedi.

— Bolarmyz, — dedi.

— Balam, ne jumysyń bar, bul jaqta neǵyp júrsiń? — dedi.

— Osy jaqta bir qart atamyz bar degenge, qolyn alyp, bir-eki aýyz aqyl-bilim alaıyn dep júr edim, — dedi.

— A-a!!! El bastap, jurt alaıyn degen ul ekensiń, sóz bastap, bı bolaıyn degen ul ekensiń, aldyńa kelse ádildigińdi aıama — aımaǵyń ketpes aldyńnan; qol bastap jol alaıyn degen ul ekensiń joldastyń myńyn alma, birin al, myń kisige — bir kisi olja sala tuǵyn, oljańdy aıamasań — joldasyń qalmas janyńnan. Júz jıyrma altyǵa kelip otyrmyn, jas kúninde qalyń ber de qatyn al, jigittiń han bolatyn, qyzdyń hanym bolatyn ýaqyty sol, qartaıǵan soń ókinbe, ulym. Qarý jısań myltyq jı, jaıaý júrseń — taıaǵyń, qarnyń ashsa — tamaǵyń.

Munan shyǵyp, Kishi júzde toqsanǵa kelip otyrǵan Taıǵan degen bıge keldi. Kelse bıdiń eli qosh eken, qosh ústinde kez bolyp, sálem berip, at ústinen kóristi. Munysyn jaqtyrmaı, bul bı de surady:

— Janym, qaı ulsyń?

— Qoshqar ulymyn.

— Ulym, neǵyp júrsiń?

Oǵan da aıtty:

— Osy jaqta bir qart atamyz bar degenge, jolyǵyp, qolyn alyp, bir-eki aýyz aqyl suraıyn dep edim.

— E! E! E! — dedi ol. — Azýy alty qarys arǵynnyń Qoshqaruly Jánibek, Alshynnyń bir aljyǵan shalyn kelemej qylyp keteıin dep edim deseńshi.

Jánibek:

— Men sóz suraımyn dep kelsem, kóńilimdi qaıtardy ǵoı, — dep, atynyń basyn buryp alyp júrip ketti.

Anadaı bara jatqanda, bı:

— Eı, Jánibek, — dep shaqyrdy. Jánibek artyna qarady. Sonda bı:

— Atyńnyń basyn burma, solaı tur, júzim kishiliginen bir aýyz sózben kóńilińdi qaıtardym. Ógizdi órge salma — qanatyń talar, jamanǵa júzińdi salma — saǵyń synar, — dedi.

---