InfoHub Logo

Memleket basshysy Qasym-Jomart Toqaev «Kitap oqý mádenıetin damytý jáne zerdeli ult qalyptastyrý jónindegi sharalar týraly» jarlyqqa qol qoıdy. Bul qujat qoǵamnyń zıatkerlik jáne mádenı deńgeıin kóterýge, bilim men tárbıe júıesinde kitaptyń rólin kúsheıtýge baǵyttalǵan.

Bul týraly Infohub.kz aqparat agenttigi habarlaıdy.

Jarlyqtyń negizgi maqsaty – shyǵarmashyl, oıly, básekege qabiletti tulǵa qalyptastyrýǵa jaǵdaı jasaý. Prezıdent mádenıet, bilim berý jáne ınovasıa salalaryndaǵy memlekettik saıasattyń basym baǵyttaryn aıqyndap, kitap oqý mádenıetin damytý, jańa formattaǵy kitaphanalar men qoǵamdyq keńistikter qurý, sıfrlyq quraldardy engizý, otandyq avtorlardy qoldaý, baspa isin yntalandyrý jáne ulttyq ádebı murany nasıhattaýdy tapsyrdy.

Jastar arasynda kitap oqýdy nasıhattaý

Úkimetke balalar men jastar arasynda kitap oqýǵa degen turaqty qyzyǵýshylyqty qalyptastyrý, oqyrman ınfraqurylymyn jańǵyrtý, ulttyq ádebıetti sapaly aýdarý jáne keń aýdıtorıaǵa taratý boıynsha naqty tapsyrmalar berildi. Sonymen qatar, 2026 jylǵy 1 qyrkúıekke deıin «Jyldyń 10 oqyrmany» respýblıkalyq jobasy iske qosylady. Al 2026 jyldyń sońyna deıin «Zerdeli ult» tujyrymdamasy bekitiledi.

Jańa zań jobalary men syılyqtar

Jarlyq aıasynda 2027 jylǵy 1 qańtarǵa deıin «Kitaphana jáne kitap shyǵarý isi týraly» jańa zań jobasy ázirlenedi. Kitap oqý mádenıetin damytýdaǵy jetistikter úshin Ulttyq syılyq taǵaıyndalyp, biryńǵaı qoljetimdi Ulttyq sıfrlyq kitaphana platformasy qurylady. Jarlyq qol qoıylǵan kúnnen bastap kúshine enedi.