InfoHub Logo

Tanymal akter Qaırat Ádilgereı, Qurmanǵazy Saǵyrbaıulyna qatysty podkastta aıtqan sózderi qoǵamda qyzý talqyǵa túsip, kúıshiniń urpaqtary narazylyq bildirgennen keıin, kópshilik aldynda keshirim surap, túsinikteme berdi.

Bul týraly Infohub.kz aqparat agenttigi habarlaıdy.

Akterdiń moıyndaǵan qateligi

Óner ıesi áleýmettik jelidegi paraqshasynda vıdeo jarıalap, kúı atasy Qurmanǵazy jaıly sózderiniń qate qabyldanýyna sebep bolǵan tustardy tarqatyp aıtty. Akterdiń aıtýynsha, onyń maqsaty kúıshiniń árýaǵyn qorlaý bolmaǵan.

“Keıingi eki kúnde meniń belgili bir podkastta Qurmanǵazy atamyzǵa qatysty aıtqan pikirim qatty talqyǵa túsip jatyr. Oral qalasynyń aqsaqal, alqabıleri jınalyp, narazylyq bildirip, tipti sotqa bermek eken. Osy tusta men óz qateligimdi moıyndaımyn”, – dedi ol.

Ádilgereı atalǵan áńgimeni birneshe jyl buryn podkast barysynda aıtyp qalǵanyn, ári ony “óte dóreki” jetkizgenin moıyndady. Ol shyraqshydan estigen áńgimeni jastar tilinde, dóreki etip jetkizgenin, bul úlken qatelik bolǵanyn aıtty.

Urpaqtarynyń talaby men akterdiń jaýaby

Qaırat Ádilgereı Qurmanǵazynyń urpaqtary kótergen talapty oryndaýǵa daıyn ekenin bildirip, kúıshiniń jatqan jerine baryp, quran baǵyshtaıtynyn jetkizdi.

“Men oraldyq aqsaqaldardyń talabyn oryndaýǵa daıynmyn, osy birneshe kúnde Astrahan qalasyna baryp, quran baǵyshtap, barlyq maǵlumatty sol jerde túsindiremin. Sizderden keshirim suraımyn”, – dedi ol.

Daýdyń týyndaýyna sebep bolǵan pikir

Oqıǵanyń mán-jaıy áleýmettik jelide taraǵan úzindiden keıin ýshyǵa tústi. Onda akterdiń podkasttardyń birinde kúıshi Qurmanǵazy jaıly aıtqan pikiri jarıalanǵan.

“Qurmanǵazy Saǵyrbaıulyn tek kúıshi retinde bilemiz, al shyn máninde baryp shyraqshydan surasań, ol baýkespe, qaraqshy bolǵan. Teris jolmen júrgen. Dosy Isataı ekeýi “gopstoppen” aınalysqan. Baılardan tartyp alyp, kedeılerge taratqan”, – degen sózderi taraǵan edi.

Osydan keıin Batys óńiriniń qyzylqurt rýynyń ókilderi men Qurmanǵazynyń urpaqtary arnaıy málimdeme jasap, akterdiń sózi tarıhı tulǵanyń bedeline nuqsan keltiredi dep esepteıtinin aıtty.

Tarıhı derekterge qaıshylyq

Málimdemede akter aıtqan aqparattardyń tarıhı derekterge sáıkes kelmeıtini atap ótildi. Atap aıtqanda, Qurmanǵazynyń mazary Aqjar emes, Reseı Federasıasynyń Astrahan oblysy Altynjar eldimekeninde ornalasqany, ondaǵy shyraqshynyń sózderi akter aıtqandaı bolmaǵany aıtyldy. Sondaı-aq, Qurmanǵazynyń dosy Isataı emes, rýlas Emshat bolǵany jáne onyń negizgi kásibi urlyq pen qaraqshylyq emes, kúıshilik ekeni alǵa tartyldy.

Aqsaqaldar akterdiń sózine quqyqtyq baǵa berilip, saraptama júrgizilýi úshin sotqa júginetinin, sonymen birge Qaırat Ádilgereıdiń Qurmanǵazynyń basyna baryp, keshirim suraýyn talap etkenin málimdedi.