InfoHub Logo

Ánshi Qaırat Nurtastyń ákesi Nurtas Aıdarbekov ulynyń týǵan kúnine oraı áleýmettik jelide júrekjardy jazba jarıalady. Ol ulyna aq tilegin arnap, kópshilikke de izgi nıetin bildirdi.

"Al aǵaıyn, balam dep aıtýǵa Alladan qorqamyn. Búgin ózderińizdiń erke uldaryńyz Qaıratjannyń dúnıe esigin ashqan kúni. Alla ǵumyr bersin! Sizderdiń aldaryńyzda Alla tartý etken qyzmetin jasap, jarqyrap júre bersin!" – dep jazdy Nurtas Aıdarbekov.

Qaırat Nurtas 1989 jyly 25 aqpanda Túrkistan qalasynda dúnıege kelgen. Ol qazaq estradasyndaǵy eń tanymal ári tabysty ánshilerdiń biri sanalady. "Qaırosh", "Legenda" laqap attarymen tanymal óner ıesi pop janrynda án aıtyp, kópshiliktiń súıispenshiligine bólengen.

Ánshi óner jolyn erte bastap, 8 jasynda ekranǵa shyqqan. Keıin estrada-sırk kolejinde bilim aldy. 2007 jyldan bastap "Tátti sezim", "Jaraldyń kim úshin", "Allaǵa shúkir", "Kóz jasyń kómektespeıdi" syndy hıt ánderimen elge tanyldy. 2008 jyly Almatydaǵy Respýblıka saraıynda alǵashqy jeke konsertin berdi.

Qaırat Nurtas tek Qazaqstanda ǵana emes, Qytaı, Qyrǵyzstan, Ózbekstan sekildi elderde de konsert qoıyp, úlken aýdıtorıa jınady. 2014 jyly "Jyldyń úzdik ánshisi" atansa, 2016 jyly "Qurmet" ordenimen marapattaldy. Sondaı-aq, ol "Ókinish", "Adel", "Arman. Kogda angely spát" sekildi fılmderge de túsken.

Ánshi 2008 jyldan beri Juldyz Ábdikárimovamen nekede. Erli-zaıyptylardyń bes balasy bar.