InfoHub Logo

Qajymuqan teńdessiz palýandyǵymen qatar, dinge de jaqyn, ımandy jan bolǵanyn dáleldeıtin estelikter de barshylyq. Birinshi áıeli, orys qyzy Nadejda Chepkovskaıany alǵanda ózge qazaq zıalylaryndaı Qajymuqan da nekesin musylmansha qıdyryp, áıeline Islam dinin qabyldatady. Nadejda atty esimin ózgertip, ardaqty Paıǵambarymyzdyń aleıhıssalam súıikti qyzy Fatımanyń atyn bergizedi. Keıin halyq ony «Bátıma» atap ketedi. Bul týraly Nadejda «Kúsh atasy» kitapta: — «Qajymuqan óte symbatty, boıshań, qaratory jigit bolatyn. Men ony bir kórgennen-aq unatyp qaldym. Sırk oıyny men kúresi eki aıǵa sozyldy, bizdiń tanysqanymyzǵa da eki aıdaı ýaqyt boldy. Osy merzim ishinde ekeýmizdiń aramyzda mahabbat oty tutanyp, ómirlik dos bolýǵa bel baılastyq. Qajymuqan meni óz eline, Ombyǵa alyp baratynyn aıtty. Men bolsam, Muqanǵa sengenim sonshalyq, ulty, salty basqa adam bolsa da endi maǵan eshkimniń zekip sóılep, zábirlik jasaı almaıtynyna kózim jetkendikten sheksiz qýanysh ústinde edim. Áli esimde, Ombyǵa kelgen soń ǵana ómirimniń ózgerip, nurlanyp, shattyqqa, jaqsylyqqa bólengenin sezdim. Qazaq halqynyń jaıdary júzdi meımandostyǵy, baýyrmaldyǵy birden baýrap áketti. Omby qazaqtary meni basqa ulttyń balasy dep jat kórmeı baýyryna basyp, týysqandaı qarsy alyp, «kelin keldi, toı bolady» dep qýanysyp jatty. Ombyǵa kelgennen soń kóp uzamaı, meni meshitke aparyp Hasen degen moldaǵa nekemizdi qıdyrdy. Sol kúnnen bastap men «Qajymuqannyń zaıyby — Bátıma» atandym», — dep eske alady. Qajymuqannyń bul áıelinen týǵan eki ul — Halıolla men Ǵabdolla.

Qajymuqan 1948 jyly qaıtys boldy. Onyń kózin kórgen kónekóz qarıalardyń kópshiligi búginde tiri. Palýannyń uly Aıdarhannyń dosy bolǵan Áshimbaı aqsaqal: «Qazandaǵy et piskenshe Aıdarhan ekeýmiz oınaýǵa kettik. Kelsek, ata tósekte dombyrasyn shertip jatyr eken. Et jep bolǵan soń ol kisi qoryldap uıqyǵa ketti. Uıqysynan oıanyp, dáret alyp namaz oqydy. Qulshylyq jasap bolyp tómen qaraı júgirip túsip at arba súırep ákelgen kir tasyn kótere bastady», — degen estelik aıtqan.

---