InfoHub Logo

Qazaqstannyń eńbek sińirgen qaıratkeri, kompozıtor Qaldybek Qurmanáli ómirden ótken tanymal ánshi Mádına Eralıeva týraly júrekke jyly tıetin estelikterimen bólisti.

Bul týraly Infohub.kz aqparat agenttigi habarlaıdy.

Kompozıtordyń aıtýynsha, Mádına Eralıeva onyń óner jolyndaǵy tulǵa retinde erekshe oryn alǵan. Ol ánshiniń ózin árdaıym qoldap, úlken senim artqanyn erekshe atap ótti. Qıyn kezeńderde kómek qolyn sozyp, birge gastróldik saparlarǵa shyǵyp, ónerde shyńdalýyna zor yqpal etkenin aıtty.

Shyǵarmashylyq joldaǵy tirek

«Mádına Eralıeva bolmaǵanda, Qaldybek Qurmanáli degen kompozıtor da bolmas edi. Ol men úshin týǵan ápkemdeı edi. Tipti basqa ánshiler de «seni ol bizden artyq kórdi ǵoı» dep aıtatyn. Mádınanyń maǵan degen qurmeti erekshe bolatyn. Meni qolymnan jetektep, oblys-oblys aralap konsert berdi. Qınalyp júrgende úıine telefon shalyp, aqsha surasam, esh aıamaıtyn. «Ala ber, mende bar ǵoı» deıtin. Ol kisiniń qoldaýynsyz men búgingideı bolmas edim», – dep kúrsindi kompozıtor.

Jeke ómirine qatysty oılar

Qurmanáli ánshiniń Bolat Nazarbaevqa turmysqa shyǵý sheshimine tańǵalǵanyn jasyrmady. Onyń pikirinshe, Mádına Eralıeva erkindigin saqtap, shyǵarmashylyq jolyn jalǵastyrǵanyn qalaǵan edi. Alaıda, ánshiniń bul tańdaýyn qurmettegenin jetkizdi.

«Men onyń Bolat Nazarbaevqa qosylǵanyn qoldaǵan joqpyn. Bir kúni telefon shalyp, kúıeýge shyǵatynyn aıtty. Men kúldim. Bala týatyndaı jaǵdaıda emes edi ǵoı. Jalǵyzdyqtan sharshaǵan shyǵar dep oıladym. Úıine barsam, eki adam otyr. Biriniń minezi aýyrlaý eken. Bir-eki suraq qoıdym, jaýap bermedi. Áıtpese, men otyrǵan jerdi dýman-kúlkige aınaldyratyn edim. Biraq men bolashaq «jezdemdi» tanymadym. Mádına ápkemniń ózi aıtqanda baryp, bir-aq bildim. «Sizge kúıeý ne kerek? Ataqty ánshisiz, úıińiz bar, balańyz bar» dedim. Ol kezde Samal aýdanyndaǵy 160 sharshy metrlik keremet úıinde turatyn. Roza Baǵlanova ekinshi qabatta, Mádına toǵyzynshy qabatta turdy. Biraq ol ózi unatyp shyqqan. Erkin júrgenin qaladym. Totyqus sıaqty bolyp qala ma dep qoryqtym. «Sál shyda, jezdeń jomart, úı de, kólik te alyp beredi» dedi. Biraq Mádına ómirden ótip ketti. Úı alyp, kólik minip, jezde men baldyz bolyp aralasqan joqpyz», – deıdi kompozıtor.

Ánshiniń sońǵy sátteri

Óner qaıratkeri ánshiniń qazasyna qatysty aýyr sátterdi eske alyp, onyń mezgilsiz ketkenine ókinish bildirdi. Ol Mádına Eralıevanyń óz ajalynan qaıtys bolǵanyn atap ótip, sol kezeńdegi oqıǵalardyń ózine qatty áser etkenin aıtty.

«Mádına Eralıeva 27 qarashada qaıtys boldy. 1 jeltoqsanda Muhtar Shahanovtyń keshinde án aıtýy kerek edi. Týǵan ápshemdeı bolǵan ánshiniń ólimin Jeńis Ysqaqovanyń kúıeýi estirtti. Aqsaıda turatyn sińlisiniń úıine baryp, azan-qazan boldyq. Denesin arnaıy samoletpen Almatyǵa ákeldi. Bárimiz áýejaıǵa bardyq. Oblys ákimi meni máıithanaǵa jiberdi. Bolat Nazarbaev ushaqta birge kele jatty. Máıithanada denesin ashty. Bolat Nazarbaev óltirip qoıdy ma, ózi óldi me, bilgim keldi. Birinshi kúıeýi Bolat Atabaev kórsin dedim. Sol jaǵynan soqqy bolǵan. Al Bolat Nazarbaevtyń oń qoly synǵan. Demek, Mádına Eralıeva rólde otyrǵan. Sonda Bolat Atabaev qusyp jiberdi. Men tok soqqandaı boldym. Bolat Atabaev «Men Bolat Nazarbaev qyzǵanyp óltirip qoıdy ma dep oılap edim, saǵan rahmet» dedi. Aıtaıyn degenim, Mádına Eralıeva óz ajalynan ólgen. Bolat Nazarbaevtyń azamattyǵyna rıza boldym. Ol jerleýge, meıramhanaǵa 20 myń dollar berdi. Báriniń shyǵynyn ózi tóledi», – dep eske aldy óner qaıratkeri.