InfoHub Logo

Astanadaǵy «Kórkem-3» turǵyn úı kesheninde bolǵan joıqyn órt tek bir otbasynyń emes, bul týraly estigen ár adamnyń júregine aýyr tıdi. Qaıǵyly oqıǵa kezinde kórshilerin qutqarýǵa tyrysqan kýáger Asha sol túnde bolǵan jantúrshigerlik jaǵdaıdy baıandap berdi.

Bul týraly Infohub.kz aqparat agenttigi habarlaıdy.

Ashanyń aıtýynsha, ol sol kúni trenıńten keıin áriptesterimen kezdesip, úıine kesh ári sharshap oralǵan. Uıqyǵa ketkenimen, tún ortasynda belgisiz dybystan shoshyp oıanady.

Túngi saǵat 01:17 shamasynda tynyshtyqty buzǵan álsiz sytyr dybysty estigen ol alǵashynda rozetkadan aqaý shyqqan bolar dep oılaǵan. Uıqyly-oıaý kúıde barlyq elektr quraldaryn rozetkadan ajyrata bastaıdy. Alaıda eshqandaı aqaý baıqalmaıdy. Sol sátte páter ishin qoıý tútin jaılap bara jatqanyn sezedi. Eń qorqynyshtysy — qabyrǵanyń arǵy jaǵynan áreń estilgen «Alla, Alla...» degen yńyrsyǵan daýys edi.

Ol dereý dálizge júgirip shyqqanda, búkil podezdi qara tútin basyp qalǵanyn kóredi. Jaǵdaıdyń kúrdeli ekenin túsingen Asha órtenip jatqan páterdiń esigin qaǵyp, kómek suraı bastaıdy. Biraq ishten esh jaýap bolmaıdy.

Qorqynyshyna qaramastan, ol basqa kórshilerdiń esikterin toqtaýsyz qaǵyp, bárin oıatýǵa tyrysady. Alaıda ıis tıgendikten, kópshiligi birden esin jıa almaı, esik ashýǵa asyqpaǵan.

Bir kezde kórshilerdiń biri — erli-zaıyptylar esikti ashyp, ne bolǵanyn suraıdy. Asha olarǵa jaǵdaıdyń qanshalyqty qaýipti ekenin túsindirip, kórshi páterde adamdardyń qalyp qoıǵanyn aıtyp, kómekke shaqyrady. Birtindep basqa turǵyndar da shyǵa bastaıdy. Degenmen, olardyń áreketi baıaý bolǵan, kópshiligi abdyrap qalǵan.

Asha sol sátte er adamdardan áreket etýdi surap, esikti buzýǵa úndeıdi. Biraq olardyń qolynda qajetti qural bolmaǵan. Soǵan qaramastan, olar órtenip jatqan páterdiń esigine jaqyndaı bastaıdy.

Keıin belgili bolǵandaı, turǵyndardyń kóbi uıqyda bolǵan ári tútinniń áserinen esin tolyq jınaı almaǵan. Osy ýaqytta Asha qaıtadan 101 qyzmetine habarlasyp, órt týraly naqty málimet beredi. Al qabyrǵanyń ar jaǵynan shyqqan álsiz daýystar bir sát te tolastamaǵan.

Órt sóndirýshiler oqıǵa ornyna jedel jetip, jalyndy aýyzdyqtaýǵa kirisken. Biraq bul tún kóptegen adam úshin umytylmas qaıǵy men úreıge toly bolyp qaldy.

Odan keıin Asha janyp ketken kórshi páterdiń otaǵasyn kórip qalǵanyn aıtyp berdi.

"Jylap kele jatyp, kóligimniń artynda, bordúrde otyrǵan er adamdy kórdim, ony basqa adamdar qorshap alypty. Jaqynyraq barǵanda onyń kórshi áıeldiń kúıeýi ekenin tanydym, onyń jaǵdaıy óte múshkil edi. Kenetten onyń densaýlyǵy syr berip, jedel járdem kóligi kelip, ony teksere bastady. Janynda onyń jáne áıeliniń týystary boldy. Olardyń sol sátte ne sezingenin elestetýdiń ózi qorqynyshty. Bizge mán-jaıdy tolyq anyqtaý úshin áńgimelesýge shaqyratyndaryn habarlady. Men munda bolǵan oqıǵanyń bárin jazǵan joqpyn, biraq osynyń ózin jazyp otyryp, júregim qaıtadan syzdap, kózime jas keldi...", - deıdi ol.

Aıta keteıik, órt 12 sáýirge qaraǵan túni Túrkistan kóshesinde ornalasqan 21 qabatty turǵyn úıde bolǵan. Órt 15-qabattaǵy páterden shyqqan. Sol sátte páterde otbasy bolǵan.