InfoHub Logo

Qanatyn erkin qaqpaǵan jýrnalıs...
Avtor: Oraz Berdaly Ǵabıtuly

Ol da bala kezinde teledıdardan dıktorlardy kórip, sózdiń qudiretine sendi. Gazet paraqtap otyryp, “bir kúni men de jazamyn” dedi. Armany asqaq edi – shyndyqty jazý, ádiletti aıtý, halyqtyń únin jetkizý. Biraq ol oılaǵan jýrnalısıka – múlde basqa, al ómirde kútken jýrnalısıka – basqa álem bop shyqty.

Qoǵamda “jýrnalıs – tórtinshi bılik” deıdi. Al shyndyqta ol – tórt jaqqa tartylǵan, tar sheńberde tirshilik etip júrgen maman. Qanat bar, biraq samǵaýǵa múmkindik joq. Erkindik jaıly jazsa – senzýra kútip turady. Ákim týraly aqıqat aıtsa – ar-namys týraly sotqa súıreıdi. Qarapaıym halyqtyń kóz jasyn jetkizse – “kereksiz másele qozǵadyń” deıdi. Osyndaıda jýrnalıs kim úshin jumys isteıdi – halyq úshin be, álde qorqyp otyrǵan redaktor úshin be?

Ol – qanatyn qaqqysy keletin qus sıaqty. Jazǵysy keledi, biraq taqyryp shektelgen. Kórgisi keledi, biraq shekara syzylǵan. Sezedi – qoǵamda ádiletsizdik kóp, biraq sony jazýǵa kelgende qorqynysh pen qysym aldymen qarsy shyǵady. Ol únsiz qalsa – ishki janaıqaıy tunshyǵady. Aıtqysy kelse – syrtqy shekteý tusaý bolady.

Jýrnalıs – tek aqparat taratýshy emes, ol – ar men senimniń ıesi. Biraq bul jol – dańǵyl emes. Bul jol – qaýip pen kúmánge toly. Qoǵam ony jıi túsinbeıdi. Bılik odan jıi qorqady. Redaksıa ony jıi tejeıdi. Al ishindegi ot – áli sóne qoımaǵan...

Qanatyn tolyq qaqpaǵan jýrnalıs – júregi erkindikti ańsaǵan adam. Ol samǵaı almaı jatsa, bul onyń álsizdiginen emes, júıeniń tym tómen tóbesinen. Biraq bir sát keledi:
Jel soǵady.
Kók ashylady.
Sonda ol da qalyqtaıdy.
Qanattyń ne úshin berilgenin umytpaı.