InfoHub Logo

Siz jaqtyrmaı, keıde dattap júrgen jýrnalıser – jalańash júr...
Avtor: Oraz Berdaly Ǵabıtuly,
Omby gýmanıtarlyq akademıasy, jýrnalısıka fakúltetiniń 3-kýrs stýdenti

Siz keıde olardy unatpaısyz. Keıde "oıyna kelgendi jazady", "bastyqtyń sózin syılamaıdy", "dabyraıtyp, daý izdeıdi" deısiz. Keıde mazaq qylyp, "jýrnalıs emes, haıp qýǵan bloger" deısiz. Biraq sol táýelsiz jýrnalıserdiń shyndyǵynda jalańash júrgenin bilesiz be?

Olardyń ústinde qymbat kostúm joq. Janynda kóleńkedeı qorǵaıtyn ákim de, arqa súıer mınıstr de joq. Olardyń qalamy – tabystyń emes, qaterdiń quraly. Sebebi olar jazǵan ár jol úshin qysymǵa ushyraıdy. Anonım qońyraý, belgisiz baqylaý, ar-namysqa tıetin jala men jaýyz pikir – solardyń kúndelikti "jalaqysy".

Táýelsiz jýrnalıser – búdjettik lentadan jalaqy almaıdy. Olar tender utqan medıa emes. Biraq halyqtyń shyndyǵyn jazady. Olar sot zalynda – jábirlenýshiniń kóz jasyn, aýylda – jurttyń ashý-yzasyn, qalada – júıesiz júıeniń kemshiligin tirkep júredi. Bireýdiń jazǵyrýy, bireýdiń dattaýy – olardyń jolyndaǵy mindetti kedergige aınalǵan.

Olar "jalańash júr" – óıtkeni artyq qorǵanysy joq. Óıtkeni olar bılikke jaltaqtamaıdy. Óıtkeni olar shyndyqty búrkemelemeıdi. Olardyń jalǵyz "kıimi" – ar-namysy men kásibı adaldyǵy.

Siz olardy jaqtyrmaýyńyz múmkin. Biraq búgin siz biletin, aıta alatyn, túsinetin shyndyqtyń kóbi – solardyń arqasy ekenin moıyndańyz.

Sebebi olar úndemeı qalsa – bárimiz qarańǵyda qalamyz.
Sebebi olar jaza almasa – biz shyndyqsyz ómir súretin bolamyz.
Sebebi olar – qoǵamnyń sońǵy tiregi.
Jalańash júrse de – shyndyqty jappaǵan jandar.

Tek bir sátke oılanyńyz:
Shyndyq úshin bárin tastap, jalańash júre alar ma edińiz?..