InfoHub Logo

Mereke kúni áıelin aıaýsyz soqqyǵa jyǵyp, aýrýhanaǵa túsirgen er adamnyń áreketi zańger Aıgúl Orynbekti qatty tolǵandyrdy. Ol bul jaǵdaıdy áleýmettik jelide jarıalap, qoǵam nazaryn aýdaryp, tıisti shara qabyldaýdy talap etti.

Bul týraly Infohub.kz aqparat agenttigi habarlaıdy.

Turmystyq zorlyq-zombylyqtyń kezekti qurbany

Zańgerdiń aıtýynsha, mereke kúni bolǵan oqıǵa kezinde áıel kúıeýiniń soqqysynan aýyr jaraqat alyp, Rosha aýrýhanasyna jetkizilgen. Aıgúl Orynbek bul jaǵdaıǵa qatty ashýlanyp, áıelderge qatysty zorlyq-zombylyqtyń qoǵamda áli de ózekti ekenin atap ótti.

Qoǵamǵa úndeý

«Meniń tańym keıde osylaı bastalady... Basqa elderde mereke kúni áıelder gúl alyp qýanyp jatsa, maǵan kómek surap habarlasady. Myna áıeldi kúıeýi dál mereke kúni aıaýsyz uryp-soǵyp, aýrýhanaǵa túsiripti. Zorlyq-zombylyqsyz Qazaqstan úshin kúresip júrgen názik jandy retinde, Shymkent qalasynyń polısıasynan osy is boıynsha zań aıasynda tıisti shara qabyldaýlaryńyzdy suraımyn. Ókinishke qaraı, mereke kúni gúl emes, judyryq alyp jatqan áıelder de bar. Bul — qoǵam úshin óte aýyr shyndyq. Halyqaralyq mereke qutty bolsyn!» - dep jazdy zańger.

Aıgúl Orynbek turmystyq zorlyq-zombylyq máselesine beıjaı qaramaýǵa shaqyryp, mundaı jaǵdaılardyń aldyn alý úshin qoǵam bolyp kúresý qajettigin jetkizdi. Onyń jazbasy áleýmettik jelide qyzý talqylanyp, kópshiliktiń qoldaýyna ıe boldy.