InfoHub Logo

Iran aýmaǵyndaǵy jaǵdaıǵa baılanysty áleýmettik jelilerde «qyshqyl bulttardyń» Ortalyq Azıa elderine, sonyń ishinde Qazaqstanǵa jetýi múmkin degen aqparat tarady. Alaıda, «Qazgıdromet» RMK bul málimetti joqqa shyǵardy.

Buǵan deıin munaı ınfraqurylymy nysandaryna jasalǵan soqqylar saldarynan Iranda iri órtter men ýly bulttar paıda bolǵany týraly aqparat shyqqan bolatyn. Bul bulttardyń Ózbekstan, Qazaqstan jáne Qytaıǵa qaraı aýyp bara jatqany aıtylǵan edi. Sondaı-aq, Tegeranda «qara jańbyr» jaýyp, kúkirt pen azot dıoksıdiniń, kúıeniń konsentrasıasy joǵarylaǵany habarlandy. Iran Qyzyl jarty aıy da terige hımıalyq kúıik shaldyryp, ókpege zaqym keltirýi múmkin qyshqyl jaýyn qaýpi týraly eskertken.

Alaıda, «Qazgıdromet» mamandary bul aqparatty ǵylymı derekter men baqylaý nátıjeleri rastamaıtynyn aıtty.

«Qyshqyl jaýyn negizinen ónerkásip, energetıka jáne kólikterden bólinetin kúkirt pen azot oksıdterinen túziledi. Olar ádette lastaný kózderine jaqyn jerde paıda bolady. Aýa massalary úlken qashyqtyqqa tasymaldanǵanda, tabıǵı atmosferalyq prosesterge baılanysty bul zattardyń konsentrasıasy aıtarlyqtaı azaıady. Bizdiń monıtorıń derekterimiz boıynsha, Qazaqstan men Ortalyq Azıa elderine mundaı lastanýdyń taralý belgileri tirkelgen joq», - delingen habarlamada.

Osyǵan baılanysty mamandar resmı meteorologıalyq jáne ekologıalyq qyzmetterdiń derekterine súıenýge jáne tekserilmegen aqparatty taratpaýǵa shaqyrdy.