Qaqtaǵan aq kúmisteı keń mańdaıly,
Alasy az qara kózi nur jaınaıdy.
Jińishke qara qasy syzyp qoıǵan,
Bir jańa uqsatamyn týǵan aıdy.
Mańdaıdan týra túsken qyrly muryn,
Aqsha júz, alqyzyl bet til baılaıdy.
Aýzyn ashsa, kóriner kirsiz tisi,
Syqyldy qolmen tizgen, ish qaınaıdy.
Sóılese, sózi ádepti ám maǵynaly,
Kúlkisi beıne bulbul qus saıraıdy.
Jup-jumyr, aq torǵyndaı moıyny bar,
Úlbiregen tamaǵyn kún shalmaıdy.
Taqtadaı jaýyryny bar, ıyǵy tik,
Eki alma keýdesinde qısaımaıdy.
Soraqy uzyn da emes, qysqa da emes,
Názik bel tal shybyqtaı burańdaıdy.
Etindeı jas balanyń bilegi bar,
Ájimsiz aq saýsaǵy iske yńǵaıly.
Qolań qara shashy bar jibek taldy
Torǵyndaı tolqyn uryp kóz tańdaıdy.

Qandaı qyzda lázzat bar jan tatpaǵan?
Sulýy bul zamannyń tek jatpaǵan.
On segiz, on toǵyzǵa kelgennen soń,
Almasy ókpe bolar qol batpaǵan.
Bulardyń keı biriniń minezderi –
Esh nárse kórmegensip burtaqtaǵan.
Keıbiri jaıdary, ashyq bolamyn dep,
Orynsyz adamdarmen jyrtaqtaǵan.
Áýelde sulý jaıy bizge málim,
Jigitti jurt maqtaǵan qyz jaqtaǵan.
Keı jigit maqtan úshin qylyq qylmaı,
Boıyna maıdalyqpen syr saqtaǵan.
Keı jigit arsyzdyqpen uıatsynbaı,
Qoly jetpes nársege tyrtaqtaǵan.

Oryndy iske júrip, oı tappaǵan,
Ne bolmasa jumys qyp, mal baqpaǵan.
Qasıetti bolmaıdy ondaı jigit
Ánsheıin qur bekerge bulǵaqtaǵan.

---