InfoHub Logo

Qaraǵandy oblysynda 20 jastaǵy Temirtaý turǵyny izdestirilip jatyr. Jas jigit avtobýs júrgizýshisimen janjaldasyp, Qaraǵandyǵa bara jatqan jolda joǵalyp ketken.

Bul týraly Infohub.kz aqparat agenttigi habarlaıdy.

Jolaýshy men avtobýs júrgizýshisi arasyndaǵy janjal vıdeoǵa túsip, áleýmettik jelide tarady. Vıdeoda jolaýshy júrgizýshiden jol aqysyn tóleýge múmkindik berýin ótinip, «Áke, ótinemin» dep aıqaılap tur. Al júrgizýshi muny birden jasaý kerektigin aıtady.

Eriktilerdiń habarlaýynsha, bul vıdeo – joǵalǵan jigittiń sońǵy kóringen sáti. Osydan keıin ol habarsyz ketken. Polısıa ony izdeýge kiristi.

İzdeý jumystary bastaldy

Oblystyq polısıa departamenti baspasóz qyzmetiniń málimetinshe, joǵalǵandyǵy týraly aryz 8 sáýirde kelip túsken. Aryzdanýshylardyń aıtýynsha, jas jigit 7 sáýirde shamamen saǵat 17:00-de úıinen shyqqan. Ol baǵdarly avtobýspen Qaraǵandyǵa bara jatqan, biraq mejeli jerge jetpeı, baılanysqa shyǵýyn toqtatqan.

«Aldyn ala málimet boıynsha, jas jigitti avtobýs júrgizýshisi jol boıynda túsirip jibergen. Oqıǵanyń mán-jaıy anyqtalýda. Jolaýshyny túsirip jibergen avtobýs júrgizýshisiniń áreketi zańnamaǵa sáıkes quqyqtyq baǵalanady. Qazirgi ýaqytta izdeý jumystary jalǵasýda», - dep habarlady vedomstvodan.

Erekshelikteri bar

Habarlanǵandaı, joǵalǵan adamnyń densaýlyq jaǵdaıyna baılanysty erekshelikteri bar, sondyqtan oǵan kómek qajet bolýy múmkin. Bul onyń alǵash ret joǵalýy emes: buǵan deıin de jigit belgisiz baǵytta ketip qalǵan. Polısıa bólimshelerine baǵyttalǵan nusqaýlar taratylyp, eriktiler arasynda aqparat jarıalandy.