InfoHub Logo

Jeti jasar Qarash qara kúshigin jetektep aýyldan shyqty. Kún búgin jyly. Jipsik qar aıaqqa jabysady. Asynyp alǵan oıynshyq myltyǵy bar. Ol ózin ańshy  Suraǵan ataıǵa uqsatyp, ishteı máz bolyp keledi. Jalbyr jún qara kúshik salpyldaǵan qulaqtaryn eleńdetip, iz kesip júgirgendeı bolady.

Bular birazdan soń toǵaıǵa kirdi. Qara kúshiktiń budan ári barǵysy kelmeıtin tárizdi. Julqa tartyp, úıge qashpaq nıette. Biraq Qarash ony jibermeıdi, ákesiniń daýsyna salyp, ursyp qoıady.

— Ózińdi sabap alsa, obal emes, — deıdi.

Suraǵan ańshynyń qara tazysynyń kúshiginiń quıryǵynyń ushy, tósi de aq, urty salbyrańqy, enesinen aýmaıdy. Al Qarash bolsa Suraǵan ańshydan aýmaıdy. Biraq Suraǵannyń qundaǵy jarylǵan qara myltyǵyndaı emes, munyki áli sý jańa, qaǵaz otalǵyshty salyp, basyp qalsa, tyrs etip atylady.

Qarash ormanǵa kirgen saıyn tóńirek qaraýyta berdi. Batyryń endi eleńdep, qorqaıyn dedi. Biraq ańshynyń qur qaıtýy uıat. Jip súıretkendeı jińishke ırek-ırek tyshqan izderi aldyn jıi kesip ótedi. Úlkenirek bir ańnyń izin kórip, túlkiniń izi bolar dep oılady.

— Joldyaıaq, al izde! — dedi ol kúshigine.

Biraq kúshigi onyń ne aıtqanyn túsinbedi. Quıryǵyn bulǵaqtatyp erkeledi. Qarash myltyǵyn ońtaılap ustap, murnyn tartqylap qoıdy. Beti tership, qyzara túsken. Mine, ańnyń iri izderi kezdesti. «Oho, mynaý qasqyrdyń izi bolar», — dep oılady Qarash. Tyrnaqtary qarǵa batyp ketipti. Qara kúshik izdi ıiskelep, qyńsylaı tústi.

— Oı, aqymaq, myltyq turǵanda qasqyrdan qorqa ma eken, atyp alamyz.

Álgi arada bógelip biraz turdy. Bozaryńqy kózderimen aınalaǵa jaltaqtap qaraıdy. Ormanǵa uzap kirip ketkenin endi baıqady. Kózi túp taldyń ar jaǵynan qalqaıǵan eki qulaqqa tústi. Qarasa — qoıan. Iá, qoıannyń tap ózi. Ármen qaraı júgirip bardy da, toqtaı qaldy. Júni qardan aýmaıtyn serkedeı aq qoıan.

— Aıt! Aıt! — dep kúshigin jumsamaq edi. Biraq tamaǵy tyǵyndalyp, daýysy shyqpady. Qoıan eki qulaǵy tikireıip, miz baqpaıdy.

Qarashtyń boıyn kenet bir ójettik bılep, myltyǵyn «oqtap», qoıandy kózdedi. Basty shúrippeni. Ormannyń ishi gúrs ete qaldy. Ańshy da, qara kúshik te selk etti. Úlken qoıan ornynda typyrlap jatyr. Ne bolyp qalǵanyn túsinbeı, sileıip tur. Ar jaqtan tymaq kıgen bireý shyqty. Typyrlap jatqan qoıandy jerden kóterip alyp, baýyzdaı bastady. Bul Suraǵan ańshy ekenin Qarash endi tanydy. Qýanǵannan:

— Ata! — dep aıǵaılap jiberdi. Ańshy jón surady.

— Biz qara kúshik ekeýmiz ań aýlaı shyqtyq, — dedi Qarash.

— Ań aýlaı shyqsań, aqjoltaı boldyń. Má, myna qoıandy shesheńe apar. Tyrnaqaldyń bolsyn! — dedi Suraǵan.

— Ata, muny atyp jyqqan kim, men be? — dep surady Qarash.

— Árıne, sen.

Bala senerin de, senbesin de bilmedi.

---