Qartaıdyq, qaıǵy oıladyq, uıqy sergek,
Ashýyń – ashyǵan ý, oıyń – kermek.
Muńdasarǵa kisi joq sózdi uǵarlyq,
Kim kóńildi kóterip, bolady ermek?

Jas qartaımaq, joq týmaq, týǵan ólmek,
Taǵdyr joq ótken ómir qaıta kelmek.
Basqan iz, kórgen qyzyq artta qalmaq,
Bir qudaıdan basqanyń bári ózgermek.

Er isi – aqylǵa ermek, boıdy jeńbek,
Ónersizdiń qylyǵy óle kórmek.
Shyǵa oılamaı, shyǵandap qylyq qylmaı,
Erinshek ezdiginen kópke kónbek.

Jamandar qyla almaı júr adal eńbek,
Urlyq, qýlyq qyldym dep qaǵar kólbek.
Aramdyqtan jamandyq kórmeı qalmas,
Myń kún synbas, bir kúni synar shólmek.

Adamzat tirilikti dáýlet bilmek,
Aqyl tappaq, mal tappaq, adal júrmek.
Ekeýiniń biri joq, aýyl kezip,
Ne qorlyq qur qyljańmen kún ótkizbek?

Nadanǵa aram – aqyldy qulaqqa ilmek,
Bul sózden ertegini tez úırenbek.
Ras sózdiń kim biler qasıetin,
Aqylsyz shynǵa senbeı, joqqa senbek.

Qyzyl araı1, aq kúmis, altyn bergek
Qyzyqty ertegige kóterilmek.
Aqsaqaldyń, ákeniń, bilimdiniń,
Sózinen syrdań tartyp, tez jırenbek.

Aqyldy qara qyldy qyryqqa bólmek,
Ár nársege ózindeı baǵa bermek.
Tarazy da, qazy da óz boıynda,
Nadannyń súıengeni – kóppen dúrmek.

Alashqa ishi jaý bop, syrty kúlmek,
Jaqynyn tiride ańdyp, ólse ókirmek.
Bir-eki joly bolǵan kisi kórse,
Qudaı súıip jaratqan osy demek.

El buzylsa, qurady shaıtan órmek,
Perishte tómenshiktep, qaıǵy jemek.
Ózimniń ıttigimnen boldy demeı,
Jeńdi ǵoı dep shaıtanǵa bolar kómek.

Syrttansynbaq, qýsynbaq, órshildenbek,
Sybyrmenen top jasap bólek-bólek.
Aramdyqpen bar ma eken jannan aspaq,
Ózimen ózi bir kún bolmaı ma álek?

Qoldan kele bere me jurt meńgermek,
Adaldyq, aramdyqty kim teńgermek?
Maqtan úshin qaıratsyz bolys bolmaq,
Itteı qor bop, ózine sóz keltirmek.

1 - Araı (parsysha) – kórkem, ádemi.

---