InfoHub Logo

Memleket basshysy Qasym-Jomart Toqaev Birikken Arab Ámirlikteriniń (BAÁ) elshisi Muhammed Saıd Muhammed Ál-Arıqıdi qabyldap, Taıaý Shyǵystaǵy ahýalǵa qatysty pikirin bildirdi.

Bul týraly Infohub.kz aqparat agenttigi habarlaıdy.

BAÁ-ge jasalǵan shabýyldarǵa alańdaýshylyq

Prezıdent BAÁ aýmaǵyna jasalyp jatqan soqqylarǵa baılanysty qatty alańdaýshylyq bildirdi. Qazaqstan azamattyq ınfraqurylymǵa jasalǵan shabýyldardy alǵashqylardyń biri bolyp aıyptaǵanyn atap ótti. Bul týraly ol BAÁ prezıdenti sheıh Muhammed ben Zaıd Ál Nahaıanmen telefon arqyly sóıleskende de aıtqan bolatyn.

Toqaev beıtarap elderdiń soǵys qımyldaryna tartylýyna Qazaqstannyń qarsy ekenin, shıelenisti toqtatýǵa jáne qaqtyǵysqa qatyspaı otyrǵan Parsy shyǵanaǵy elderiniń egemendigi men aýmaqtyq tutastyǵyn qurmetteýge shaqyratynyn jetkizdi.

Kelissóz alańyn usyný

Memleket basshysy jaǵdaıdy dıplomatıalyq jolmen retteý qajettigin basa aıtty. «Elimiz qajettilik týyndaǵan jaǵdaıda, izgi nıet bildirip, beıbit kelissózder júrgizý úshin alań usynýǵa daıyn ekenin rastady», - delingen Aqordanyń baspasóz qyzmeti taratqan málimette.

Strategıalyq áriptestikti nyǵaıtý

Budan bólek, Toqaev Qazaqstannyń BAÁ-men strategıalyq áriptestikti odan ári damytýǵa jáne negizgi baǵyttar boıynsha yntymaqtastyqty nyǵaıtýǵa nıetti ekenin atap ótti. Óz kezeginde, elshi Muhammed Saıd Muhammed Ál-Arıqı Qazaqstannyń BUU Jarǵysynyń qaǵıdattaryn qoldap, BAÁ jáne Parsy shyǵanaǵy arab memleketteri Yntymaqtastyq keńesi elderiniń egemendigi men qaýipsizdigin qurmettegeni úshin alǵys bildirdi.